Shillong, Risaw 18
Ka Federation of Khasi-Jaiñtia and Garo People (FKJGP), West Khasi Hills ka la aiti ïa ka dorkhast ha u Myntri Rangbah ka Jylla, u Conrad K. Sangma ban pynpaw ïa ka jingshah pyndik ha ki jaka khappud, ka jingbym biang ki ‘Outpost’ bad ka jingduna ha ka koit ka khiah, pule-puthi, surok bad ki kam jngohkai pyrthei.
Halor u pud u sam, ka seng ka la ong ba ki briew jong ka Assam (Officials) dang shen ki la pynthut ïa ka jingtei jong ka ICDS Centre ba la mynjur da ka Meghalaya bad kyntu ïa ka Sorkar ban “pyndep bad pynkut noh ïa ki kam ba ïadei bad u pud u sam.”
“Ki briew jong ngi ha ki thaiñ khappud ki ïakynduh jingeh namarba ki briew ka Assam ki wan bad pyndik ïa ki. Ki Syiem, ki Sirdar bad ki khlieh nongsynshar ki kwah ban don hapoh ka Meghalaya,” ka la ong.
Ka seng ka la ong ruh ba ki ‘Outpost’ jong ka Mallangkona bad Langpih “ki long kum ki ïing skum” bad kim long kiba shngaiñ haba ïanujor bad ka ‘Outpost’ jong ka Assam kaba don mar pyrshah ka Langpih; da kaba kyrpad na ka bynta ki jingtei thymmai bad ki nongtrei kumjuh.
Halor ka koit ka khiah, ka FKJGP ka la dawa ïa ka ‘Cancer Wing’, ‘Dialysis Centre’, ki doktor ba la pyntbit kyrpang ha ka ‘Paediatrics’ – ‘Neurologist’, ‘Gynaecologist’, ‘Ophthalmologist’, ‘Radiologist’, ‘Obstetrician, ‘Paediatrician’, ‘Nephrologist’, ‘Pathologist’ – ki kali kit nongpang bad kali kit metïap ha Nongstoiñ Civil Hospital; ha kaba ki longkmie armet ki hap ban ïasam lang ïa ki ‘Ward’ ba khapngiah.
“Ïa mynta, ka MCH ka treikam tang na ka bynta ka OPD. Ka jingpynkynriah ïa ki kmie bad ki khun sha MCH kan pynduna ïa ka jingkhapngiah,” ka la ong.
Ka seng ka la kyntu ruh ban kyntiew kyrdan ïa ki PHC ha Maweit, Rambrai sha ki CHC bad ïa ki Sub-Centre ha Mawlangkhar, Umdang sha ki PHC.
Haba ïadei bad ka pule-puthi, ka seng ka la ong ba kam don satia kano-kano ka kolej Sorkar kaba don ïa ka shnat pule ‘Science’ bad ‘Commerce’ bad ka ïingmala ba la dep jong ka ‘Polytechnic’ ha Mawrusyiar lem bad ka ITI kim pat treikam satia.
Halor ki surok, ka seng ka la kyntu ïa ka kylla kaba ar jong ka surok Nongstoiñ-Rambrai-Chaigoan, ka jingpynheh ïa ka surok Mawthungkper-Jaidoh-Mawkaton-Nongkasen, bad ka jingpynbha ïa ka surok Riangdo-Shallang-Maweit.
Da kaba ñiew ïa ka West Khasi Hills kum ka thaiñ kaba riewspah ha ki kam jngohkai pyrthei, ka seng ka la kyntu ban maramot ïa ka surok Sangriang-Diengsyiang sha ka dewlynnong Nongkhnum bad ka surok thymmai sha kshaid Langshiang bad Weispi, nalor ka ‘Artificial Turf’ ha ‘Headquarter’ bad ‘Synthetic Track’ ha Nongpathar.
