Shillong, Risaw 18
Ki nongshong shnong ka Nongspung-A ha Ri Bhoi District, ki la pan jingïarap na u Myntri Rangbah ka Jylla, u Conrad K. Sangma, ban pynsted ïa ka jingtei ïa ka ïingskul kaba thymmai kaba la kular ha ka por ba u leit sha katei ka shnong myn ha ka 22 tarik u Jymmang 2025, katba ki dang tyrwa ban tei ïa ka ïing skul.
Ha ka jingujor kaba la aiti sha u Myntri Rangbah ka Jylla ha ka 17 tarik u Risaw, ki nongshong shnong ki la pynkynmaw ba u Conrad u la pynthikna ïa ki ban ïoh ïa ka ïing skul kaba thymmai hapoh ka Chief Minister’s Special Development Fund (CMSDF) ha ka jingïadon lang ki nongshong shnong, u MLA ka thaiñ bad u Deputy Commissioner ka Ri Bhoi District. U Myntri Rangbah u la soi ruh ïa ka memorandum ba la ai da u nongsynshar shnong bad aiti sha ka tnad pule puthi ban leh ïa kaba donkam.
Hynrei ki nongshong shnong ki la kynnoh ba wat hapdeng ka jingpynpaw bunsien sha ka tnad pule puthi bad sha u Deputy Commissioner ha kine ki shisnem bad san bnai, hynrei katei ka jingdawa ka la shim por ban ïaid shakhmat.
Katkum ka jingujor u ophisar ka District School Education, u T Shangrang u la phah ban mang tyngka na ka bynta ka jingthmu ban tei ïa ka skul sha u Deputy Commissionner ha ka 13 tarik u Risaw 2026. Hadien kata u Deputy Commissionner u la phah sha ka ophis u Myntri Rangbah ka Jylla ha ka 14 tarik u Risaw 2026.
Ki nongshong shnong mynta ki pynpaw ïa ka jingpyrshah halor kane ka jingthmu
ban shna ïa ka skul, da kaba kynnoh ba la pynïaid da u Bah Ebrin, u engineer ba ïadei bad ka Samagra Shiksha Abhiyan (SSA) ha Ri Bhoi district, bad khlem da leit jngoh ïa ka jaka ba la thmu ban tei ne bishar bniah ïa ki jingdonkam jong ka skul.
Ka jingujor ka la ong ruh, ba ka jingheh jong ka ïing kaba la thmu ban tei ka kdew, ba ka palat ïa ka jingheh jong ka jaka baroh kaba ka skul ka don. Ka la kdew ruh ba ka jingthmu ban shna ka paw ba kan pyndap tang ïa ka bynta jong ka Lower Primary, katba ka ïing skul kaba la don lypa ka don ïa baroh ar ki bynta jong ka Lower Primary bad Upper Primary.
Ki nongshong shnong ki la kyntu ïa ka Sorkar ba kan pynlong ïa ka jingtohkit halor ka jingpynkhreh ïa ka dur ban shna, bad ban pan jingshai da ka jingthoh na u engineer ba dei peit bad ban pynshisha ba la pynlong ne em ïa ka jingleit peit bniah ïa ka jaka, shuwa ban pyndep ka jingthmu.
Ki la dawa ruh ban bishar bniah bad pynbeit ïa ka jingshna katkum ka jingheh jong ka skul bad ka jingdonkam jong ki khynnah skul bad ki nonghikai. Ka Dorbar Shnong ka ong “Dei ba ïamir jingmut shuwa ban mynjur ïa ka plan ba khatduh”.
“Ka jingpyrshah jong ngi, ka long ïa ka jingpynwandur bym ïahap kaba khlem kheiñ bha ïa ka jinglong jingman ba shisha jong ka jaka,” la ong ka jingujor, da kaba pynksan ba ki nongshong shnong ki dang ïai bteng ban pynthikna ba ïa ka projek la pyntreikam hok bad ban pynpoi ïa ki jingmyntoi sha ki khynnah trai shnong.
Ka jingpynslem kaba la slem bha, ka la wanrah ïa ka jingsngewkhia kaba khraw ïa ki nongshong shnong, khamtam haba ka Nongspung A, ka angnud ban pynkylla sha ka Shnong Smart Model. Ki nongshong shnong ki ngeit ba ka ïing skul kaba mynta bad kaba biang ki tiar ka long kaba donkam bha ban kyntiew ïa ki lad pule puthi bad ban pynthikna ïa ka lawei kaba bha na ka bynta ka pateng ban wan.
Ia kane ka jingujor la kopi ruh sha u Myntri ka tnad pule-puthi u Bah Lahkmen Rymbui, u MLA ka Jirang u Bah Sosthenes Sohtun, u Chief Secretary u Dr Shakil P. Ahammed, u Commissioner bad Secretary ka tnad Pule Puthi u V. K. Mantri, u Director ka tnad Pule Puthi u Richa Kulkarni bad u District School Education u Bah T. Shangrang.
