Shillong, Risaw 18
U Symbud Myntri Rangbah ka Jylla, u Bah Sniawbhalang Dhar ha ka Sngi Thohdieng u la ong ba ka Sorkar ka la mang T.380 klur na ka bynta ka surok Nongstoiñ-Ranikor bad ka por ba ïadei bad ka leit ka wan ha ka bynta jong ka Nongstoiñ-Maweit ka la duna na ka 3-4 kynta sha ka 45 minit, kaba pyni ïa ka roi ka par kaba khraw ha ka thaiñ Nongstoiñ.
Haba kren ha ka jingïalang pynhap pyrda ïa ka ‘2nd MLA Cup 2026’ ha Nongstoiñ, West Khasi Hills, u Bah Dhar u la ong ba kane ka thaiñ, kham hashuwa ka bym da ïoh bynta ïa ki skhim ba ïadei bad ki jaka sor, ka la sakhi ïa ka jingkylla bak-ly-bak ha kine ki 3-4 snem ba la dep.
“Ha ki 3-4 snem mynshuwa, ki skhim ba ïadei bad ki jaka sor kim shym la rung sha sor Nongstoiñ, hynrei mynta kam don jingduna shuh ha ka liang ka roi ka par – naduh ki surok, ki lynti ïaid kjat bad kiwei,” u la ong.
U Bah Dhar u la ïathuh ba u Symbud Myntri Rangbah ka Jylla, u Bah Prestone Tynsong ha ka Sngi Palei u la buh ïa ki mawnongrim na ka bynta katto-katne ki projek ba kongsan, kynthup ïa ka surok Sohpian-Nongstoiñ kaba la ap khmih lynti la slem mynta.
“Hynnin ka sngi, u Bah Prestone u dang shu buh ïa u maw nongrim na ka bynta kiba bun ki projek, kawei ka dei ka surok Sohpian-Nongstoiñ kaba phi baroh phi la angnud. Nga kynmaw ïa ka surok Nongstoiñ-Maweit kaba baroh ki thrang, ha ka jaka ban shim por 3-4 kynta, mynta tang 45 minit,” u la ong.
Haba jer kyrteng ïa kiwei pat ki jingmang, u la ong, “Ngi la mang haduh T.380 klur bad ka kam ka ïaid beit, naduh Nongstoiñ sha Ranikor, ha Balat, Mawsynram ha Weiloi. Na Weiloi ha Mawsynram kumba duna ïa ka T.200 klur, na Mawsynram sha Umpung haduh Ranikor, T.274 klur.”
Da kaba ban jur ba ka roi ka par kam dei tang ha ka liang ki surok, u Bah Dhar u la bynrap, “Ka roi ka par kam dei tang ïa ki surok, kynthup ïa ka koit ka khiah. Ngi sngewthuh ba lada ym don ka roi ka par, kam don ka ïoh ka kot, namarkata, ngi pyrshang ban pynleit jingmut ha baroh ki liang, khamtam kumno ban wanrah ïa ka roi ka par sha sor Nongstoiñ.”
