Ka khubor jong ka jingpynkhreh ki lai ngut ki MLA ka United Democratic Party (UDP) ban ryngkang noh sha ka National People’s Party (NPP) ka la urlong ha ka sngi Nyngkong, bad ka la pynstait bad pynswai hi ïar ïa ka UDP kaba la long ka seng riewlum kaba khlaiñ bad kaba la wan ba-ar ha ka jingbun paid hadien ka ilekshon MLA ha u snem 2023. Ym tang ba ka la shah rem kput ha ka ilekshon MP ha u snem 2024 hynrei mynta ka UDP ka la duh noh haduh 11 ngut ki MLA na ki 12 ngut ba ka don baroh shi katta. Kane ka jingmih noh jong ki 11 ngut ki MLA ka la pynlong ïa u Bah Metbah Lyngdoh uba dei u President ban sah noh marwei kum u MLA ka party bad na kaei kaba la paw bad jia ha kine ki taïew kiba la leit, ka pyni ba ki MLA kim sngew tynnad satia shuh ban dang treikam hapoh ka jingïalam jong u Bah Metbah.
Dang ha ki snem kiba la leit, ngi la sakhi ïa ka jingstait ïar jong ka Congress kaba la duh syndon ïa ki dkhot hapoh ka ïingdorbar thawaiñ ka Jylla kata hadien ba ki 4 ngut ki MLA jong ka, ki la phet bad leit ban pynïasoh noh sha ka NPP. Mynta ka la wan jia sa ha ka UDP kaba la don sa tang uwei u MLA na kaei kaba ka la jop 12 ngut ha u 2023. Kaei ka ban jia nangne shakhmat ïa ka UDP khamtam lei ha ka ilekshon MP shiteng samoi ka ban wan. Tang ka por hi kaba lah ban batai kaei ka ban jia, ngin hap ban shu ap beit kmang sa ïa kata ka por. Ka la long shisha ka jinglehraiñ ba kat ka UDP kaba ju dei kawei na ki seng riewlum kaba khlaiñ bor hapoh ka Jylla mynta ba kan don sa tang uwei u MLA.
Katkum kaba paw shabar, ka jingsdang khihwin jong ka UDP ka la long ruh ha ka por ba ka la don ka jingkylliang shuki Myntri hapoh ka Sorkar MDA-2 da u Myntri Rangbah ka Jylla u Conrad K Sangma. Hangne ngi sakhi ba ka la don ka jingpynhiar shuki noh ïa u Bah Paul Lyngdoh bad u Bah Kyrmen Shylla bad ha kaba la mih bad shimti bujli pat da u Bah Metbah Lyngdoh bad Bah Lahkmen Rymbui. La ong ba ka jingbujli shuki Myntri kam dei kaba la rai da u Conrad hynrei ka dei lyngba ka jingtyrwa kaba la ai na ka UDP bad la ong ruh ba ka jingtyrwa ïa ki kyrteng ban bujli la leh khlem ka jingïamir jingmut lang jong baroh ki 12 ngut ki MLA ka UDP ha kato ka por. Kine ki long kita ki jingpaw hynrei ngim tip hato haduh katno ka long kaba shisha. Tang kita kiba don hapoh kin sngewthuh khambha.
Ïa ka UDP la seng ha u snem 1997 da u Bah EK Mawlong (bam kwai ha dwar U Blei) bad dei ha u snem 1998 ba u Bah BB Lyngdoh (bam kwai ha dwar U Blei) u la shimti kum u Myntri Rangbah ba nyngkong ka UDP. Ka UDP ka la dei kawei na ki seng riewlum kaba la ju don beit hajan manla ki Sorkar hapoh ka Jylla. Ha manla ki ilekshon, ka UDP ka ju jop bun ki MLA bad bunsien ka don beit ha ka Sorkar Synrop bad ha u snem 2023 ruh ka la ïoh ïa ka jingjop kaba heh, haba haduh 12 ngut ki MLA ka la ïoh. Hynrei kumba ka long mynta, phra ngut ki la phet sha ka BJP bad lai ngut mynta ki la phet sha ka NPP. Hato kane ka seng kaba ju tip baroh shi katta kum kawei na ki seng riewlum kaba khlaiñ hapoh ka Jylla, kan jah kyrteng noh bad kaei ka ban jia ïa u Bah Metbah Lyngdoh, la un lah ban pynkhie im biang ïa ka ne ban poi ruh sha u pud ban khylliap lama noh.
