Vijayawada, Risaw:
Ka sorkar pdeng kan shim ïa ka rukom treikam jong ka Andhra Pradesh na ka bynta ban pynïaid ïew ïa ki mar ba la shna da ki kynhun ïarap ïalade jong ki kynthei (SHGs), katba ka National SARAS Mela-2026 kan ai jinghikai ba kyrpang sha ki 15 hajar ngut ki kynthei ha ka jylla ban pynkhlaiñ ïa ka sap treikam jong ki ha ka kam seng kam seng jam bad ban pynïar ïa ki lad pynïaid ïew, ong u Sivaraj Singh Chouhan, Myntri ba dei khmih ïa ka Rural Development, Agriculture & Farmers Welfare.
Haba ai jingkren ha ka jingplie ïa kane ka mela ha Vijayawada, u Chouhan u la ong ba u Myntri Rangbahduh ka ri u Narendra Modi bad u Myntri Rangbah ka jylla u N. Chandrababu ki la leh eiei ban pynkhlaiñ na ka bynta ki kynthei ha ka SHG.
U la ong ba u Chandrababu u la pynkhlaiñ ïa ki kynhun jong ka DWCRA lyngba ka jingkyrshan jong ka teknoloji bad u la kdew ba ka Andhra Pradesh ka don 11 lak tylli ki SHG bad ka don hakhmat eh ban kyntiew ïa ki Lakhpati Didis.
U Chouhan u la ong ba ka SHE Marts kan ïarap ban pynïaid ïew ïa ki mar jong ka SHG ha ka rukom kaba kham heh, ka ban pynlah ïa ki kynthei nongkyndong ban seng ïa ki kam kiba neh, ban kyntiew ïa ka ïoh ka kot jong ki bad ban noh synñiang sha ka jingthmu jong ka Viksit Bharat.
U la ban jur ba ka jingpynkupbor ïa ki kynthei ha ka ïoh ka kot ka long kaba donkam bha ban tei ïa ka ri India kaba la kiew bha.
U Chouhan u la ong ba kumba 3.5 klur ki kynthei ki la kylla long ki Lakhpati Didis pyrshah ïa ka thong jong u Myntri Rangbahduh ka ri u Modi ban long hynriew klur. Ki SHG ki la ïoh ram baroh kumba T.13 lak klur, kaba pyni ïa ka jingroi jong ki ha ka ïoh ka kot ha ki nongkyndong. U la ong ba ki kynthei nongkyndong ki lah ban long ki nongseng kam seng jam kiba jop bad ai kam ai jam ïa ki spah tylli ki longïing lada ki ïoh ïa ki lad ki lynti kiba biang, ka jinghikai bad ka jingïarap pisa.
U la ong ba kumba 1,500 ngut ki kynthei nongmihkhmat na ki jylla bapher bapher ki la pyni ïa ki jingshna kti, ki mar shna kti bad ki tiar tynrai ha kane ka mela, kaba la pynlong ha Vijayawada shabar jong ka nongbah Delhi ha ka sien kaba nyngkong.
