Shillong, Risaw 19
Ka United Democratic Party (UDP) ka la ïakynduh ïa ka jingduhnong kaba khraw ha ka saiñpyrthei ha ka sngi Nyngkong hadien ba lai ngut napdeng ki saw ngut ki MLA jong ka, kila leit ban pynïasoh noh ïalade sha ka National People’s Party (NPP).
Da kane ka jingleit pynïasoh jong ki lai ngut ki MLA, ka la pynlong ïa ka UDP ban sah sa tang uwei u MLA ha ka ïingdorbar kaba 60 ngut, kata tang u Bah Metbah Lyngdoh uba dei ruh u President jong ka. Katba ka NPP ka la nangkhlaiñ bad kiew mynta sha ka jingdon haduh 36 ngut ki dkhot baroh.
Ki lai ngut ki MLA ka UDP kiba la ïasoh bad ka NPP ki long u Bah Paul Lyngdoh na West Shillong Konstitwensi, Bah Renikton Lyngdoh Tongkhar na Mawkyrwat Konstitwensi bad u Bah Nujorki Sungoh na Mookaiaw Konstitwensi.
Ha kane ka sngi, kiba la leit ïakynduh ïa u Lamphang ka ïingdorbar thawaiñ u Thomas A Sangma ki long tang u Bah Paul bad Bah Renikton ha kaba ki la aiti ïa ki kot ki sla ban pynïasoh sha ka NPP. Katba u Bah Nujorki um shym la lah ban ïadonlang bad ki namar u dang don hapdeng ka jingsumar.
Ïa kitei ki ar ngut ki MLA la synran da u President ka NPP Meghalaya Bah Prestone Tynsong, National Vice President Bah Sniawbhalang Dhar kiba long ruh ki Symbud Myntri Rangbah ka Jylla, ki Myntri Sorkar, ki nongïalam lem bad kiwei-kiwei.
Haba kren sha ki lad pathai khubor, u Bah Prestone u la ong, “Ka jingdon MLA jong ngi kala kiew sha ka 36 ngut. Ngi ieh ha ka jingstad jong u Lamphang ka ïingdorbar. Sngewsih ba u Bah Nujorki um shym la lah ban wan namar ba u leit phah sumar. Ha ki sngi ban wan, un sa ïadon lang bad kane ka kynhun. Ngi kyrmen ba u Lamphang un ai ïa ka khubor ba bha sha ngi”.
Halor ka jingpynrung kum ki dkhot ba pura sha ka NPP, u Bah Prestone u la ong ba ka party ka dang pynbeit ïa ki jingdonkam baroh bad kan sa pyntip hadien. U Lamphang un sa shong bishar mynta ïa ki kot ki sla bad sa ai ïa ka rai ba khatduh.
Haba kylli la kan don ka jingbujli Myntri, u Bah Prestone u la pynshai ba kam shym la don satia kano kano ka jingbuh kyndon lypa.
“Kam dei halor ka nongrim ka jingai shuki Myntri. Kumba u Bah Paul u la pynpaw, ka jingïasoh NPP ka mut ba ki don katto katne ki jingeh kaba ki sngew ba ka NPP ka lah ban pynbeit. Ka jingkylli kam mih satia halor ka shuki Myntri. Kam shym don kano-kano ka jingbuh kyndon lypa,” u la ong.
Haba kylli hato u MLA ba marwei ka UDP un dang ïai bat ïa ka shuki Myntri, u Bah Prestone u la ong, “Phi lah ban kylli ïa kata ka jingkylli na u President ka UDP. Nga dei u President ka NPP”.
Kane ka jingkylla ha ka saiñpyrthei kala wan jia tang da ki taïew hadien ba phra ngut ki MLA ka UDP kila leit ïasoh sha ka BJP, kaba la dep ruh ban ïoh ïa ka jingithuh na u Lamphang ka ïingdorbar thawaiñ.
