Imphal, Risaw:
Ki shijur ki nong Nepal ki la mynsaw na ka jingdei kuli ha ka jingshah thombor ha ki kynhun kieng atiar ha ki bynta ka surok National Highway 202 ha Kamjong distrik jong ka Manipur ha ka sngi U Blei, 18 tarik u Risaw, shisngi hadien ba uwei u riew paidbah Kuki u la shah pynïap bad saw ngut kiwei pat ki la mynsaw ha ka jingshah thombor ha ka shnong Chassad ha kaba ki la don ruh kumba 15 tylli ki ïing ba la shah thang, la ong ki heh pulit.
Ïa kine ki shijur la tip kyrteng kum u Sandip Dahal, 35 snem ka rta bad ka kurim jong u ka Bepanah Dahal, 29 snem ka rta, kine ki dei ki nongshong shnong jong ka Charhajare kaba don ha Kangpokpi distrik, ha kaba kitei ki runar, ki la siat ha ka por kumba 11.45 baje mynstep hapdeng ka surok Mahadev bad Guwaltabi kaba don ha ki bynta jong ka surok Imphal-Nagaland lyngba ka Ukhrul, la ïathuh ki pulit.
Ïa kiba mynsaw la pynkit noh sha ka jaka sumar jong ki shipai kaba don hajan, ha kaba ki la ïoh ïa ka jingïarap ba nyngkong. Baroh arngut ki la mynsaw malu mala na ki kuli hapoh ki kjat jong ki bad la pyllait noh ïa ki hadien ba la dep sumar, la ïathuh ki heh pulit.
Kane ka jingshah thombor ka la jia hapdeng ka jingjur ka jingkulmar ha ka distrik. Ha ka nohphai sngi Saitjaiñ, ki suba lehnoh ki la hiar thma ïa ka shnong Chassad ha kaba u riew paidbah Kuki u Seikhohao Haokip u la ïap bad saw ngut kiwei pat ki la mynsaw, kynthup ki nongïalam shnong.
Ha kawei pat ka jingjia ha ka miet jong ka sngi Saitjaiñ, ki suba lehnoh ki la thang ym duna ïa ka 15 tylli ki ïing jong ki jaitbynriew Kuki ha katei ka shnong, kaba la pynlong ïa ki nongshong shnong ban phet krad bad wad jaka rieh ha ki jaka khlaw ba marjan bad ha kawei ka ktem shipai, la ïathuh ki heh pulit.
