Bhubaneswar, Risaw:
U Myntri Rangbah ka jylla Odisha u Mohan Charan Majhi ha ki khyndiat sngi jong ka taïew ba la lah u la pynbna ba ka sorkar jylla kan shna sa 2,91,666 tylli ki ïing hapoh ka jingtreikam jong ka Antyodaya Gruha Yojana (AGY) bad kan pynjlan ïa kane ka skhim da ar snem haduh u snem 2029.
Kane ka sienjam kan pynsted ïa ka jingpyntreikam jong ka sorkar jylla ban pynbiang ïa ki ïing sha baroh ki longïing kiba dei hok, khamtam eh ïa ki longïing kiba duk bad kiba rit paid kiba la shah iehnoh na ka Pradhan Mantri Awas Yojana.
Ka jinglut baroh jong ka projek kaba long T.7,550 klur kan neh kumjuh. Hynrei ka pisa kaba la mang 3,500 klur tyngka na ka bynta ka jingpynbha ïa ka skhim yn pynkylla sha ka jingtei ïa ki ïing bathymmai. Kane ka skhim kaba la thmu nyngkong ban treikam haduh u snem 2027 hynrei mynta kan treikam haduh u snem 2029, la ong u Majhi.
U la bthah ruh ïa ka tnad Panchayati Raj bad ka tnad Umdih ban pynlong ïa ka jingwad bniah ban lap ïa kiwei pat ki nongïoh jingmyntoi kiba dei hok.
Katkum ka jingong jong u CMO, kito kiba la dep ban ïoh T.48,500 ne duna hapoh ka skhim, ryngkat bad kiwei kiwei ki longïing kiba dei hok, yn pyrkhat ban kynthup lang.
Ka sorkar jylla ka la pynkhlaiñ ruh ïa ki jingai jingkyrshan na ka bynta ki nongïoh jingmyntoi ki ban pyndep ïa ka jingshna ïing hapoh ka por ba la buh. Hapoh katei ka kyndon ba la pynkylla, ki nongïoh jingmyntoi kiba pyndep ïa ki ïing jong ki hapoh san bnai kin ïoh ïa ka jingai jingkyrshan kaba T.35,000, pyrshah ïa kaba mynshwa kaba la ai T.20,000 na ka bynta ban pyndep ïa ka jingtei hapoh saw bnai.
Kumjuh ruh kito kiba pyndep ïa ka jingtei hapoh hynriew bnai kin ïoh T.20 hajar, haba ïanujor bad ka jingai jingkyrshan kaba mynshwa kaba long T.10 hajar na ka bynta ban pyndep ïa ka jingtrei hapoh hynriew bnai. Ka rukom ai jingkyrshan ba la pynkylla kan pynshlur ïa ki nongïoh jingmyntoi kiba kham bun ban pyndep ïa ka jingtei hapoh ka por ba la buh bad kan pynlah ïa ki longïing kiba kham bun ban ïoh jingmyntoi na ka skhim, ong u CMO.
Ïa kane ka Antyodaya Gruha Yojana la sdang da ka thong ban shna ïing na ka bynta san lak tylli ki longïing.
Ka pynbiang nyngkong eh ïa ki longïing kiba duk bad kiba shem jingeh ki bym dei hok ban ïoh ïa ka jingïarap ban shna ïing hapoh ka Pradhan Mantri Awas Yojana.
U Majhi u la ong ba ki rai kin ïarap ïa ka jylla ban pynurlong ïa ka jingthmu jong ka ban pynthikna ïa ka ïing na ka bynta kawei pa kawei ka longïing kaba dei hok ha ka por kaba kham kloi.
