Patna, Risaw:
Kawei ka Panchayat ha ka distrik Madhepura jong ka Bihar ka la rai ban pyntreikam da ka Social Fine kaba T. 25 hajar ïa kino kino kiba shah kem ba kiba dih ne die ïa ki jingdih pynbuaid kum shi bynta ban pynlong ïa kane ka shnong kaba lait na ki jingdih pynbuaid.
Ki nongshong shnong jong ka Sahugarh Panchayat ki la rai ruh ban ym ïarap ban ïoh jamin ïa kiba haïing kiba shah kem ha ki kam ba ïadei bad u drok, ha ka jaka kata ki la kular ban ïatreilang bad ki pulit ha ki jingtohkit.
Ïa kine ki rai la shim ha ka jingïalang ha ka 17 tarik, Risaw, ba la pynïaid da u Mukesh Kumar u khlieh jong ka Panchayat bad la ïashim bynta da ki nongmihkhmat ba la jied, ki heh Panchayat barim bad ki nongshong shnong ka thaiñ.
Kane ka jingïalang ka long hapdeng ka jingsngewkhia ba ka thaiñ Kosi, kaba ka Madhepura ka dei ka bynta jong ka, ka la nang kylla long ka jaka jong ki jingdih buaid. Ki nongshong shnong ki la ong ba donkam ïa ka jingïatreilang ban ïakhun pyrshah ïa ka jingdih buaid bad ka jingkhaïi beaiñ, da kaba kynthoh ba tang ka jingïakren kan ym pat biang.
Kum shi bynta jong ka rai, ki nongshong shnong ki la mynjur ba kino kino kiba pynkheiñ ïa ka jingkular kin ngat ha ka jingpynshitom ha ka imlang sahlang kaba T.25 hajar bad yn ujor sha ka bor synshar ban leh katkum ka aiñ.
U President ka BJP Madhepura distrik u Deepak Kumar uba la donlang ha kane ka jingïalang u la ong ba ki nongshong shnong ki la rai da kawei ka sur ban khanglad ïa ka jingdih bad jingdie ïa baroh ki jait jingdih pynbuaid ha ka Panchayat.
Ki nongïashim bynta ki la soi ruh ïa ka jingthoh jingkular kaba aiti ïalade ha kane ka jingthmu. U Mukesh Kumar u la ong ban pynlong ïa ka Panchayat kaba lait na ki jingdih buaid ka dei ka jingkitkhlieh lang bad ba uwei pa uwei u nongshong shnong un don ka bynta ha ka jingïalap.
