Shillong, Risaw 27
Ka leit ka wan ha ka step jong ka sngi Ba-ar ka la ktah jur ha nongbah Shillong hadien ba kawei ka trok kit dewïong ka la kylla hapdeng jong ka surokbah hajan ka lad ban rung sha Jaiaw Langsning hajan Rani Motor.
Kane ka trok kaba la kylla ka don ïa u registration number AS26-AC-1244. Ka jingkylla jong kane ka trok ka la wanrah ïa ka jingdheng kali kaba shyrkhei ha ki thaiñ Mawlai, Garikhana shaduh sha Umshyrpi ter ter bad kumjuh ruh sha kiwei ki bynta jong ka nongbah.
Katkum ka jingtip kaba la ïoh lum kane ka kali ka la kylla ha ki por kumba 2 duna mynstep bad ka dei ka trok kaba dang thmu hiar sha Guwahati.
Ka jingjur ka jingdheng kali ka la long ruh ha ki por hapdeng ka 7 baje shaneng mynstep namar ka dang dei ruh artad ka por ba ki kmie ki kpa ki leit ban buh skul ïa la ki khun. Kane ka jingkylla jong ka trok ym tang ba ka la wanrah ïa ka jingdheng kali kaba jur hynrei ka la pynlong ruh ïa kiba bun ki khynnah skul ban hap leit phai ïing noh na shiteng surok khamtam kito kiba leit da ki bos.
Na ka liang ki pulit ki hap ban pynïaid da u laiñ ïa ki kali naduh ki trok, ki kali rit bad ki bus katba ki JCB ki dang pynkynriah ïa u dewïong napdeng surok ban lait ki kali.
