Shillong, Risaw 27
U Lat ka Jylla, u C.H. Vijayashankar u la kyntu ïa ka Indian Red Cross Society (IRCS), Meghalaya State Branch ban pynïar ïa ka jingtreikam jong ka bad ban kynthup shuh ki samla ha ka kam shakri parabriew.
Haba pynïaid ïa ka ‘Annual General Meeting’ jong ka IRCS Meghalaya, ha Lok Bhavan kum u President jong ka, u Lat u la ai jingïaroh ïa ka Society kaba la ïai bteng ïa ki kam ai jingïarap parabriew.
“Pynkhlaiñ ïa ki prokram jong phi, pynïar ïa ka jingtreikam jong phi bad kynthup shuh ïa ki nongtrei mon sngewbha, khamtam ki samla, khnang ba ka khubor jong ka jingshakri parabriew kan poi sha man la ki kyndong-kynshrot jong ka Meghalaya,” u la ong ha ka jingïalang.
Haba pynpaw ïa ki jingsngewkhia, u Lat u la ong ba ka jingarmet khynnah, ka jingkyrni ha ki kam dih drok bad ka jingktah mariang ïa tang uwei u jait jingthung ka donkam ïa ka jingphai khmat lang ban ïada ïa ki shnong ki thaw bad ka mariang.
Ha kajuh ka por, u la kyrshan ïa ka jingtyrwa ban tei ïa ka ïingmala bathymmai na ka bynta ka Society, da kaba kdew ba ka jaka ba kyrpang kan ïarap ha ka jingïatreilang ba kham bha haba ïadei bad ki kam ai jingïarap parabriew, ka jingai jinghikai bad ka jingïarap ba kyrkieh, bad kyrpad na ka bynta ka jingïatreilang ban pynlong ïa ka projek.
Ha kane ka jingïalang la don lang u Additional Chief Secretary sha u Lat ka Jylla, u H.C Chaudhary bad Chairman ka IRCS Meghalaya, Pa’iem Laborious Manik S. Syiem.
Ka jingïalang ka la shim ïa 4 tylli ki mat – ka jingpynskhem ïa ka ‘Minutes’ jong ka AGM ba khatduh kaba la pynlong ha ka 3 tarik u Nohprah, 2025, ka jingpdiang ïa ka ‘Annual Report’ u snem 2025-26, ka jingpdiang ïa ka kaiphod pisa ba la bishar bniah na ka bynta kajuh ka por, bad ka jingpynshai halor ka jingthmu ban tei ïa ka ïingmala bathymmai.
La pynkut ïa ka jingïalang da ka jingïamir jingmut halor ki jingjop bad ka lynti kaba ka Society kan shim nangne shakhmat.
