Jowai, Risaw 28
Ka ïew Amwi Ar Lyngdoh Jarain Private Market ha Jarain, la plie biang ha ka sngi Ba-ar, hadien ba ka JHADC bad ki saw tylli ki Dorbar Shnong ki la pynbeit ïa ki jingïapher kiba la ktah ïa ka jingtreikam jong ka ïew.
U MLA ka Amlarem, u Bah Lahkmen Rymbui, uba long u Kongsan ha kane ka sngi, u la pynpaw ba ka ïew kan kyntiew ïa ka khaïi pateng bad plie ka kamai jakpoh ïa ki nongshong shnong bad ki nongdie jingdie na ki shnong ba marjan.
U EM ka JHADC, u Medling M. Swer, u la ai jingïaroh ïa ka jingïatreilang jong ki bor shnong, ka Managing Committee bad ka Council ban pynbeit ïa ki jingeh. Katba u Dolloi ka Elaka Amwi, u Jemiwell Pyrtuh, u la ban jur ïa ka jingdonkam jong ka jingïatylli hapdeng ki saw tylli ki Dorbar Shnong.
Ka SO ka JHADC, ka Kong R. Syiemlieh, ka la ïathuh ba kane ka ïew, kaba la sdang treikam naduh ki snem 1980, ka la shah khang hadien ki jingïapher hapdeng ki saw tylli ki Dorbar Shnong naduh u snem 2017. Ka jingkhang ka la long katkum ka rai jong ka Executive Committee jong ka JHADC, No. 7, ha ka 3 tarik Nailar 2023.
Hadien ba ki Dorbar Shnong ki la ïa sngewthuh jingmut biang bad aiti ïa ka resolution ha ka 12 tarik Jymmang 2026, ka JHADC ka la pynlong ïa ka jingtohkit ha ka 15 tarik Jylliew 2026, bad hadien kata la mynjur ban plie biang ïa ka ïew hapoh ka kyrteng thymmai, Amwi Ar Lyngdoh Jarain Private Market. La soi ïa ka jingïateh ha ka 10 tarik Nailar 2026.
Ka ïew kan treikam shisien shi taïew, bad la khmih lynti ba kan kyntiew ïa ka ïoh ka kot jong ki paidbah. La kyntu ruh ïa baroh ban ïatreilang, sumar ïa ka khuid ka suba bad pynneh ïa ka shongsuk shongsaiñ khnang ban pynlong ïa ka ïew kaba treikam bha bad kaba neh slem.
