Shillong, Risaw 28
U President ka Congress ha Meghalaya Bah Vincent H Pala ha ka sngi Balang u la ong ba ki MLA kiba don ha ka liang synshar ki la khih jingmut bad ka BJP ka lah ban kut ha ka Liang Pyrshah naba ka doh met kan leit tang sha ka NPP bad ki shyieng hapdeng ki paralok ba ïatreilang.
Kane ka jingkynthoh jong u, ka la wan hadien ba ki 11 ngut ki MLA ka UDP ki la kynthih diengkper kata 8 ngut sha ka BJP bad 3 ngut sha ka NPP.
Haba kren sha ki nongthoh khubor, u Bah Pala u la ong ba ym shym la don uwei ruh u MLA uba la wan mih ne ban ïakren bad ka Congress haduh mynta hynrei ka jingkhih bad jingbym sngewtynnad ka la sdang ban don hapoh ka kynhun jong ka liang synshar.
“Ym pat don uwei ruh ban wan ne ban ïakren bad ngi mynta, hynrei nga la ïoh jingtip na ki paralok kiba bun ba kiba bun ki MLA ha ka liang synshar ki la lynga, khamtam na Rilum Garo ym tang ha Rilum Khasi-Jaiñtia. Tang katto katne kiba la ïoh jingmyntoi, lait nangta kiwei kim don jinglaitluid wat ha ki konstitwensi ki jong ki,” u la ong.
U Bah Pala u la kam ruh ba kine ki MLA ki la pynlong ruh ïa ki jingïalang hapoh hapoh.
“Ki briew ki bym sngewtynnad shuh ha kane ka Sorkar kaba mynta, ki dei hi ki briew kiba don hapoh ka Sorkar. Ka UDP ka dei kaba don hapoh ka Sorkar hynrei balei pat ki hap ban mih? Ki pyrkhat ba lada ki leit sha ka BJP kin ïoh khambun ka jingïada, khambun ki jingmyntoi hynrei nga artatien la kane kan don hangta,” u la ong.
“Ki la ai jingkren ba kam don satia ka jingbujli ha ka Sorkar, ka jingbujli Myntri bad baroh kiei-kiei kin neh beit kumjuh. Kumta lada kaei kaba ki ong ka long kaba shisha, ka jinglynga kan nangjur nangjur,” u la bynrap.
U Bah Pala u la kren lypa ba ka BJP kan sa shah pynshong ha ka Liang Pyrshah.
“Phin nym kyndit shuh ba ha kawei ka sngi ka BJP kan sa shong ha ka Liang Pyrshah namar ka jinglynga kan sa long kaba jur ba ka doh met kan leit tang sha ka bynta naei ba u Myntri Rangbah u wan bad ka shyieng kan leit sha kiwei pat ki paralok, kumta kan sa pynlong ïa ki ban shong ha ka liang pyrshah,” u la ong.
“Ngan long uba kmen lada ka Sorkar ka treikam bha, ka Jylla ka leh bha. Hynrei kumba ka long mynta, kam don satia kata ka jingleh bha, ka jingthmu ka long tang ban leh kano-kano ka projek ha ki konstitwensi ki jong ki. Ha ki konstitwensi jong ki Myntri, phin ïohi ïa ki surok kiba bha, ki skul kiba bha, ki hospital kiba bha katba ha ki bym don Myntri pat ym don eiei. Ka dei ka Sorkar ym na ka bynta ki 60 tylli ki konstitwensi hynrei tang na ka bynta ki 12 tylli,” ong u Bah Pala.
