Shillong, Risaw 28
Haba pynjur ïa ka jingïakhih pyrshah ïa ka ‘Shillong Ropeway Project’, ka Joint Action Committee (JAC) ha ka Sngi Balang ka la ïakynduh ïa u Syiem ka Hima Mylliem bad kyrpad ban pyndam noh ïa ki sanad ba la ai sha ki Rangbah Shnong kiba ai wai ïa ka jaka na ka bynta kane ka projek.
“Kine ki Rangbah Shnong ki la shet kylla ïa ki nongshong shnong ka Riat Laban Dorbar Pyllun. Ngi la dawa na u Syiem ba un pyndam noh ïa ki sanad jong ki,” la ong ka President ka JAC, ka Kong Deborah Marbaniang.
Ka la kynthoh ba ki Rangbah Shnong kim don bor ban ai wai ïa ka Shillong ‘Viewpoint’.
“Ka ‘Viewpoint’ kam dei ka jaka shimet. Ka dei ka jaka paidbah, ka jaka kaba long trai da ki nongshong shnong jong ka Riat Laban Dorbar Pyllun. Ka sanad na ka Hima Mylliem ka thung ïa kine ki Rangbah Shnong tang kum ki nongpeit-nongkhmih – ban ïada, ban pynneh-pynsah bad ban peit ïa ka jaka. Kim don hok ban die, lilam ne ban ai wai,” ong ka Kong Marbaniang.
Katkum ka jingong jong ka, ki nongïalam ka Riat Laban Dorbar Pyllun ki la kular ba yn sa weng noh ïa katei ka jingaiwai.
“Ngi la ïakynduh ïa u President bad Secretary kham hashuwa. Ki la kular shai sha ngi ba kin weng noh ïa ka jingïateh kular ai wai jaka ba la ïasoi bad ka Sorkar. Kin sa shong jingïalang mynta ka sngi bad kin sa ai ïa ngi da ka jingthoh. Ngi dang ap ïa kata ka jingpynthikna,” ka la ong.
Haba pynkynmaw biang ïa ka nongrim jong ka JAC, ka la ong, “Ngi la kyrpad jur ïa ki Rangbah Shnong ba kin weng noh ïa ka jingïateh bad ban pyndam noh ïa katei ka projek. Ka Sorkar ruh ka dei ban pyndam noh ïa ka. Lada ym lah ban pyndam ïa kane ka projek, ka JAC kan ym shong kli kti.”
