Shillong, Risaw 28
U Bah Arius Basaïawmoit uba dei u nongshong shnong ka Banglasohphie u la pynpaw ka jingsngewlyngngoh halor ka jubab RTI kaba u la ïoh pdiang na ka tnad Public Health Engineer (PHE) ka Mairang Division, kaba dap tang da ki jingpyndam ba tah sia lieh.
Haba kren sha ki nongthoh khubor ha ka sngi Balang u Bah Arius, u la ong ba u la pan jingtip RTI na ka ophis jong ka PHE Mairang Division halor ki skhim kiba hapoh ka Mairang C&RD Block, u la ïathuh ba ha ka 13 tarik Risaw 2026 u la ïoh pdiang ïa ka jubab kaba don haduh 1625 sla, hynrei ki jubab ba u ïoh pdiang ki long ki bym lah ban pdiang namar ba bun ki jubab ba ki ai, ki dap da ka jingtah sia lieh.
Shuh-shuh u Bah Arius u la ong ba kane ka jingleh ka long kaba ym lah ban pdiang, u la dawa ba ka tnad PHE ka dei ban pynlong ïa ka ‘Joint Inspection’ pyrshah ïa ka PHE Mairang, ha kajuh ka por ruh u la pynpaw ba un sa buh jingujor pyrshah ïa ka tnad PHE Mairang Division sha ka Ministry Jal Jeevan Shakti.
U la ïathuh ba ka jingpan RTI jong u ka long ban lap la ki pyntreikam bha ne em ïa ka skhim sha ki paidbah, hynrei katkum ka jinglap ki don ki shnong ba ki don ka Top um, hynrei u Pipe um don bad ki paidbah kim ïoh um satia.
“Ngi sngewlyngngoh ba kat ïa ka kot jong u paidbah balei phi pyndam sia lieh? Ka jingleh ka PHE Mairang ka pyni ba ka aiñ kam treikam shuh,” u la ong bad u la dawa ba ka Sorkar ka dei ban pynshitom ïa kiba donkti namar ba ki pyndam sia lieh ïa ka pisa u paidbah.
