Shillong, Risaw 29
U MLA ka Nongpoh Constituency u Bah Mayralborn Syiem u la pynpaw ka jingsngew skhem ba ka Bharatiya Janata Party (BJP) kan pynurlong ïa ki mat jingdawa kiba la sahteng la slem ka Meghalaya, u la kam ba ka rai jong ki 8 ngut ki MLA ka UDP ban ïasoh sha ka BJP ka dei kaba la pynshong nongrim halor ki mat jingdawa ki ban pynurlong hashuwa ka ilekshon 2028.
Ki jingdawa ki kynthup ban weng noh ïa ka hukum khang tih dewïong, ban ai jingmynjur ïa ka Meghalaya Resident Safety and Security Amendment Bill 2020, ban pynrung ïa ka ktien Khasi ha ka khyrnit ba phra ka riti synshar ka Ri, ban pynkynriah ïa ki briew kiba sah ha Them Metor bad ka kam ba ïadei ka Foreign Contribution Regulation Act lane ka FCRA.
Haba jubab ïa ka jingkylli la u shaniah ïa ka jingkular ba hashuwa jong ka BJP ban weng ïa ka hukum khang tih dewïong hapoh 180 sngi bad shano kin leit lada ki jingdawa kim urlong, u Bah Mayralborn u la ong “Kane ka jingkren ka la mih hashuwa ka ilekshon 2023. Ngam dei satia u ba ïakren bad ki nongïalam ka BJP ha u 2023. Mynta ba ngi la don bynta, nga sngewskhem bha ba kin sa pynurlong ïa kine ki jingdawa haba buh hakhmat ïa ka rukom long ka saiñpyrthei ha ka thaiñ Shatei Lam-Mihngi” u la ong.
“Lada ym lah pynurlong, ngin sa shim ïa ka rai ha ka por kaba biang. Ka por kan sa batai. Ha ka saiñpyrthei ka don beit ka lynti ban leit. Kam don jingeh satia shano ban leit” u la bynrap.
Halor ki daw ba leit ïasoh BJP, u Bah Mayralborn u la ong ba ka rai ka long ban kyntu ïa ki san tylli ki mat jingdawa kiba la sahteng la slem. “Ban ïasoh bad kawei na ki seng saiñpyrthei kaba heh duh ha ka pyrthei ka dei haba buh ha ka jingmut jingpyrkhat ïa ki mat jingdawa jong ka Jylla kiba la sahteng la bun-bun snem” u la ong.
Haba batai shuh-shuh u la ong, “Ban pynrung ïa ka ktien Khasi bad Garo. Ngi la mynjur ïa ka Resolution ha ka 27 tarik Nailur 2018, hynrei ym shym la leh eiei la phra snem. Ka Amendment jong ka Foreign Contribution Regulation Act Bill 2026 kaba ktah ïa ki seng niam, ki Society, ki seng trei mon sngewbha kiba ap ïa ka synñiang pisa nabar Ri, ban pynsuk bad weng ïa ka jingkhang tih dewïong. Ban pynphai sted noh ïa ka Meghalaya Residents Safety and Security Amendment Bill 2020 bad ban pynkynriah ïa ki briew kiba sah ha Them Metor”.
“Tang ka Sorkar Pdeng, ka Sorkar NDA ba ïalam da ka BJP, kaba lah ban leh eiei ïa kine. Ngi kum ka kynhun ba phra ngut ngi sngew ba to ngin prat ïa ka lynti khnang ba yn lah pynurlong noh ïa kine ki jingdawa hapoh ka por kaba biang. Kane ka dei ka nongrim ba ïasoh BJP. Ngim don eiei pyrshah ïa ka UDP lane ki nongïalam” u la ong.
Haba kyntait ba ka FCRA ka dei kaba long pyrshah ïa ki Khristan, u Bah Mayralborn u la ong “Mano ba ong ïa phi?, pynshisha ïa ka, pyni ïa nga ïa ka kyndon kaba long pyrshah ïa ki Khristan. Ka jingpynthymmai ïa ka FCRA Certificate man la u snem kam dei kaba long pyrshah Khristan, ka long kaba hap ban leh, ka dei shaphang ka jingai jingkheiñ”.
U la ong ka jingdawa ka long ban pynthymmai ïa ka syrnot ka dei ban long nangne shakhmat bad kaba kham suk. “Naduh mynta lada pyntreikam ïa ka, dei ban long nangne shakhmat. Kaei ka jingleh bakla haba pyntymmai ïa ka FCRA man la u snem? Mynta ki seng kin hap leit sha Delhi ban pynthymmai. Lah ban kham pynsuk, leh online, buh ïa ka cell ha Guwahati ban pynsuk ïa ki briew jong ka Jylla. Kane ka dei kaba ngi ïakhun kum ka kynhun na ka bynta ki paid Khristan” u la ong.
“Kum u Khristan ba shisha bad u riewngeit, nga don ïa ka jingngeit kaba skhem ba da ka jingïadon hapoh ka BJP ngi lah ban ïakhun kham bha bad ïada ïa ki paid Khristan” u la ong.
