Shillong, Risaw 29
U Symbud Myntri Rangbah ka Jylla Bah Sniawbhalang Dhar ha ka sngi Palei u la ong, ka aiñ kan sa leh ïa la ka kam halor ka jingkhaïi bad shalan beaiñ ïa u dewïong hadien ka jingkylla jong ka trok kit dewïong ha sor Shillong kaba la wanrah ïa ka jingdheng kali kaba jur.
“Lada long kumno-kumno ruh, ka aiñ kan shim la ka jong ka lynti, la ka long kaba beaiñ, mano-mano ba leh beaiñ, ka aiñ kan leh ïa kaba donkam,” ong u Bah Sniawbhalang.
Ha ka sngi Ba-ar, ka President ka CSWO Kong Agnes Kharshiing kala ujor da ka ejahar ha thanad Lumdiengjri ha kaba ïadei bad ka jingkylla ka trok kit dewïong ha Jaiaw.
Ka Kong Agnes ka la dawa ban kurup ïa ka kali bad pynlong ïa ka jingtohkit kaba bniah, da kaba ong ruh ba ka trok kaba la kit palat pud ka la buh ha ka jingma ïa ki jingim briew bad ktah jur ïa ka leit ka wan, kaba donkam ban shim lad pynshitom hapoh ka Sections 281 bad 285 jong ka Bharatiya Nyaya Sanhita (BNS).
