Shillong, Risaw 29
U Symbud Myntri Rang-bah ba khmih ïa ka tnad Transport, u Bah Sniawbhalang Dhar ha ka sngi Palei jong ka taïew u la ïathuh ba ka Sorkar ka la shong bishar ïa ki kynrum-kynram kiba mih halor ka Shillong Ropeway Project bad pynpaw ïa ka jingkyrmen, ba yn sa lah ban pynbeit noh ha ki khyndiat taïew ban wan.
“Ka kynrum-kynram ka la mih bad ngi na ka Sorkar ngi la shong bishar ïa ka kam. Ngi kyrmen ba kan sa beit noh ha kine ki khyndiat sngi, khyndiat taïew ban wan. Ka projek ka long katkum ka aiñ, ngi la ïoh ïa baroh ki jingbit na ka tnad kiba dei khmih,” la ong u Bah Sniawbha-lang.
U la ong ba kum kine ki kynrum kynram, kidei kiba shipor bad kan shim por ban pynsngewthuh ïa ki paidbah.
“Kum kine ki kam ki ju mih bad leit, wat khuslai yn sa pynbeit ïa ki. Hateng-hateng, ki lah ban shim ïa ka por ban pynsngewthuh ïa ki paidbah namar kadei ka projek kaba heh. Ngim kyntur ïa ka bad ngi la bud ïa kawei ka sienjam hadien kawei kat kum ka aiñ bad u Myntri Rangbah ruh u la pynshai bha ïa ka. Shuwa ban mang ïa ka, ngi la ïoh ïa baroh ki jingbit bad hadien kane ngi la khot ïa ka tender” ong u Symbud Myntri Rangbah.
U Bah Sniawbhalang u la pynpaw ruh, ba ka Sorkar bad ka District Council kin hap ban ïatreilang.
“Ka Sorkar ka tip kumno ban trei bad ka District Council ruh ka trei ha la ka jong ka rukom treikam, hynrei ngi hap ban ïatreilang na ka bynta ka jingmyntoi jong u paidbah,” u la bynrap.
