Mawkyrwat, Risaw 29
Ka Hynñiewtrep Youth Council (HYC) Keniong bad Thiepdiengngan Unit hadien ka jingud jingnam jong ki nongshong shnong ha kaba ïadei bad ka skul Thiepdiengngan Deficit Lower Primary kaba don ha ka shnong Thiepdiengngan, Keniong, Ranikor Civil Sub Division, South West Khasi Hills District, ha ka 27 tarik mynta u bnai ki la leit jurip ïa kane ka skul bad ha kaba la lap ïa bun ki jingduna.
Ha kane ka jingjurip la lap ba kane ka skul ka don tang kawei ka kamra klas bad namar ka jingdon ki khynnah skul kaba la kot kumba 50 ngut eiei la hap ban pynlong kamra klas lang hapoh ka ophis jong ka skul, watla katta ruh dang hap ban pynshong lang hajuh ïa ki khynnah kiba pule ïa ka klas 1 bad klas 2 bad ïa ki klas 3 haduh klas 5.
Nalor kine, ka seng ka la lap ruh ba ki jingdonkam hapoh skul kum ki ben, ka um ki dang duna bad kaba kham pynsngew diaw ka long ba don tang kawei ka nonghikai hapoh kane ka skul kaba la wanrah jingeh shibun ïa ka ban pyndep lut ïa baroh ki kam naduh ki kam hikai ïa ki khynnah, ka jingleh online bad kiwei ki jingdonkam la hap ban trei lut marwei.
La ïoh ban ïakren bad u Secretary kane ka skul Bah Beatarland Thongni uba la ïathuh ba ha ka jingshisha kane ka skul ka don arngut ki nonghikai, hynrei naduh ba la shongthait noh uwei u nonghikai naduh u bnai Naitung jong u snem 2025, ka Sorkar ka la pynslem bad kam shym pat la thung bujli da kiwei watla dep ban leh ïa ka written test naduh u bnai Jylliew, 2026 bad kaba sah ka long sa tang ka personal interview.
Ka seng ka la pynpaw ruh ba kan nym shong thait, kan sa leit ban ïakynduh ïa u SDSEO ban tip shai ba balei ban pynslem ïa kane ka personal interview.
Ka seng ka la pynpaw ruh ïa ka jingsngew bynniaw bad kubur ba ka jinghiar ka pule puthi hapoh ka Jylla ka dei beit ha ki skul ha nongkyndong, watla ki skul ki don ha manla ki shnong, hynrei kaba sngewsih ka long ba don tang ki skul, ki building hynrei ki kamra klas kim don kumba long ka skul ha Thiepdiengngan Keniong kaba la seng ïa ka naduh ka snem 1983 kaba dei kawei na ki skul kaba la sei bun ki riewstad riew shemphang.
Hynrei mynta kane ka skul ka la hiar bad duna ki khynnah kiba wan pule namar ka jingbym biang ki kamra klas bad ka jingbym biang ki nonghikai.
Kumta ha kaba ïadei bad kane, ka seng ka kyrpad ïa ka Sorkar bad ïa u MLA Bah Pius Marweiñ ba kin phai khmat lem sha kane ka skul ban ai jingïarap naduh ka building bad ki kamra klas kiba biang, ha kajuh ka por ka kyrpad ïa ka Sorkar ba ka dei ban thung noh kloi ïa ka post kaba dang lait khnang ba kane ka skul kan long ka jingmyntoi bad ka jingkyrkhu ïa ka lawei jong ki khynnah.
