Shillong, Naiwieng 02
U MLA ka West Shillong Constituency u Bah Paul Lyngdoh ha ka Lah Sngi U Blei u la bam smai biang kum u Myntri Sorkar ha ka sien kaba ar ha ka jingïalam jong ka seng saiñpyrthei ka National People’s Party (NPP) bad pynpaw ba u khlem dawa lane pan ïa kano-kano ka tnad ba un peit, hynrei u pdiang ban bteng ïa ka tnad kam jngohkai (Tourism) halor ka jingkyrpad u Myntri Rangbah.
Ïa u Bah Paul Lyng-doh la pyntian smai da u Lat ka Jylla u C.H. Vijayashankar ha Lok Bhavan ha ka jingïadonlang u Myntri Rangbah Conrad K. Sangma, ki Symbud Myntri Rangbah Bah Prestone Tynsong, u Bah Sniawbhalang Dhar lem bad kiwei ki Myntri.
Haba kren sha ki nongthoh khubor u Bah Paul u la ïathuh ba u khlem don kano-kano ka jingdawa lane ka jingai jingmut ïa u Myntri Rangbah, hynrei u Myntri Rangbah u la pynpaw ba u kwah ban ïohi ïa u Bah Paul ba un bteng ban peit ïa ka kam jngohkai pyrthei, kumta u la ong. “U Myntri Rangbah u kwah ïa nga ban shimti ïa kane ka tnad ïa kaba nga pdiang sngewbha.”
“Ka kamram jong nga ka long ban pynthikna ba ngin pynïaid biang ha ka lynti kaba dei ïa ka tnad jong ka kam jngohkai. Ngi donkam ban pynbeit ïa ki jingeh ha ka lynti kaba ïabit ïa biang lang, haba ïakren bad ki kynhun ha kajuh ka por ban ïengskhem ha ka nongrim” u la bynrap ba un sa shong bishar ïa ki kam ba ïadei ka tnad jngohkai ha kine ki khyndiat sngi ban wan.
“Ha kine ki khyndiat sngi ban wan, ngan sa lum ïa ka jingïalang ha ki bynta bapher-bapher kynthup ki heh Ophisar ka tnad kam jngohkai. Ka Meghalaya ka don kyrhai ka lad bad ki don ki projek ki ban kyntiew ïa ka kyrdan jong ka Jylla kum ka jaka wan jngohkai, kumta kan ym don ka jingïapeiñ ïa kum kine ki projek” u la ong.
Halor ka jingshngaiñ jong ki nongwan jngohkai ha ka Jylla, u la ong “Ki don katto katne ki lad ki lynti kiba la don ha ka jingmut jingpyrkhat jong nga bad khlem pep ngin sa nang pynkhlaiñ ïa ka lad ïada bad ka jingshngaiñ ym tang ki nongwan jngohkai, hynrei ki nongshong shnong ruh kumjuh. Ka plan ka la thut tad haduh u snem ba la leit hadien ba don ka jingkylla ba kynsan ha u nongkhmih. Mynta ngan sa bishar thymmai hangno ka kam ka la poi hadien ba la ïaid palat shisnem.”
Haba kylli la un ïoh lang ïa ka tnad Social Welfare ruh, u la ong “Nga khlem pat ïoh ktien eiei ruh em, hynrei lashai ka sngi phin sa lah ban tip”.
Halor ki khubor ba ïa u Bah Metbah Lyngdoh la pynbor ban ïehnoh kam khnang ban plie lynti ïa u Bah Paul ban ïoh ïa ka shuki Myntri, u Bah Paul u la ïathuh ba u khlem ïoh jingtip eiei da kaba ong ba kine ki jia ha CM Secretariat lane CM Bungalow. “Ngam lah ban ïoh ïa kum kine ki jingtip, hynrei kaei kaba nga lah ban ïathuh ïa phi ka long ba nga la pyrshang kat kaba lah ym tang ban don ha Ophis, hynrei ha ka bor ban pynthikna ba ka bor ba ngan treikam kan ai jingmyntoi ïa ka Jylla”.
