Shillong, Naiwieng 02
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba u sngewkmen ba ka Joint Parliamentary Committee (JPC) halor ka ‘FCRA Bill’ ka la jied ïa ka Shillong na ka bynta ka jingïalang ba nyngkong eh, hadien ba u la kyrpad ïa u Chairman, u Sanjay Jaiswal ban wan jngoh ïa ka nongbah.
“Ha ka por ba nga don ha Parliament ha u snem 2016, nga la don ka jingïadei kaba ïajan bha bad u bad kiba bun ki MP, hynrei kumno-re-kumno, ngi don ka jingïadei kaba ïajan bha. Kumta nga la sngewkmen haba la thung ïa u kum u Chairman jong ka JPC bad u dei da shisha u briew uba biang bha namar ka jingshemphang jong u, ka jingrangbah ha ka kam bad u dei ruh u briew uba sngewthuh bha ïa ki jingsngew jong ka ri baroh kawei,” la ong u Conrad.
U la ong ruh ba u la ‘phone’ mar-mar ïa u Jaiswal hadien ba u la shimti ïa ka kam.
“Haba u la shimti ïa ka kam, mar-mar nga la ‘phone’ ïa u bad kyrpad ba un wan sha Shillong bad baroh ki kynhun seng bad ki kynhun niam bapher-bapher kiba ïoh pdiang ka jingïarap pisa na ki tnad bar-ri, ngi lah ban ïarap pynlong ïa ki jingïalang ban long hangne ha Shillong. U la sngewkmen shibun bad u la mynjur mardor. Dei na kata ka daw ba ki don hangne mynta ka sngi bad hynnin ka sngi kumjuh,” ong u Conrad.
U Myntri Rangbah u la ïathuh ba u la ïakynduh ïa kane ka komiti ha Kad Liengsuiñ Umroi hashuwa ba kan leit phai noh.
“Nga la ïakynduh ïa ki ha Kad Liengsuiñ Umroi hashuwa ba kin leit bad nga la ai khublei ïa ki ba ki la wan jngoh. Hooid, ngim shym la lah ban ïakren lut ïa baroh ki jingtip ba bniah. Hynrei kaba kongsan ka long ba baroh ki nongshim bynta kiba don ki jingsngewkhia ki la ïoh lad ban pynpaw ïa ki jingeh jong ki. La ïathuh sha nga ba ka JPC ka long kaba ïar-jingmut bad ka la ïakren bniah ïa baroh ki bynta bad ka la ai por ruh 15 sngi ïa ki kynhun seng ban aiti ïa ki jingsngew jong ki lem bad ki jingsngewkhia,” u la ong.
“Ka dei ka rukom synshar paidbah kaba i-shongkun kaba la urlong bad nga tikna ba ngin sa ïohi ïa ki jingmih kiba bha. Haba nga dang ïakren bad ki dkhot jong ka JPC ha Kad Liengsuiñ ruh, ki la pynpaw ba hooid, ngi la sngap bad ïohsngew lut ïa baroh, ngin sa khmih bniah ïa baroh ki mat ba la pynsngew bad ngin sa peit kumno ban ïaid nangne shakhmat,” u la bynrap.
“Ka JPC mynta ka leit sa sha Chennai bad nangta sha ki jaka ha South India. Nga dap da ka jingkmen kaba khraw ba ki la wan bad nga sngewnguh shibun ïa u ‘Chairperson’ bad ïa baroh ki dkhot kiba la jied ïa ka nongbah Shillong kum kawei na ki jaka jong ka jingwan jngoh jong ki,” la ong u Conrad.
