Shillong, Naiwieng 02
U Myntri Rangbah ka Jylla Conrad K. Sangma ha ka sngi Nyngkong u la kyntait ïa ka jingkynnoh jong ka Congress ba ka National People’s Party (NPP) ka la ïaleh ban pyntroiñ bad pyndam ïa ki paralok ba ïatreilang kata kham hashwa ka People’s Democratic Front bad mynta ka United Democratic Party.
“Kam dei satia ban pyntroiñ ne pyndam ïano-ïano ruh. Ngi la ïatreilang bad baroh kito la slem bha bad mynta kine ki MLA ki la sngew ba ki kwah ban wan ban ïatreilang noh bad ka NPP bad ha kaba ki la pynpaw ruh ïa ka jingshaniah ka jong ki ha ka party, ki la pynpaw ka jingshaniah jong ki ha ki nongïalam,” ong u Conrad.
U la ong ba ka rai ka dei kaba la shim da ki MLA ban pynkhlaiñ ym tang ïa ka party hynrei kumjuh ruh ïa ka Sorkar.
“Kumta ka dei beit ka rai kaba ki la shim hi na lade ban pynkhlaiñ ïa ka party bad kumjuh ruh ïa ka Sorkar bad ruh ban pynthikna ba ngin lah ban trei ha ka rukom kaba paka ha ki sngi ki ban wan, la kan shong ha ka bynta kaba sah jong ka samoi treikam bad ruh ban phai sha ka samoi jong ka ilekshon 2028. Kumta ka dei beit ka rai kaba la shim hi da ki MLA. Kam dei satia kaba ngi pyrshang ban khih bad pyrshang ban pynpra ïa ki, khamtam ki paralok ba ïatreilang. Ngi kwah ban ïohi ba ka seng kan nang ïai kiew bad khlaiñ nang khlaiñ,” u la ong.
“Kumta haba shim lut ïa kine ki bynta, ngi sngewkmen shisha mynta ka sngi ba bun ki MLA ki la pynïasoh bad ngi bad kane ka la nangpynkhlaiñ ïa ka party bad kumjuh ruh ka la nang pynkhlaiñ ïa ka Sorkar bad ruh ka ai ïa kata ka jingkyrmen kaba khlaiñ na ka bynta ki paidbah bad ka Jylla,” u la bynrap.
