Shillong, Naiwieng 02
Ka Presbyterian Church of India (PCI), ka la pynsngew sha ka Joint Parliamentary Committee (JPC) ka Foreign Contribution Regulation Amendment Bill, 2026, ba kin ym lah ban pdiang ïa ka jingthmu pynkylla ïa ka FCRA da kaba knieh noh ïa ki jingdon jingem.
Haba kren sha ki lad pathai khubor u Rev.Socratis Diengngan, Chairman ka FCRA Committee PCI hadien ba la wai ka jingïalang u la ong, ba ka Meghalaya ka hap hapoh ka Autonomous District Council, kumta ban knieh noh ïa ki jaka bad ki jingdon jingem khlem da ïaid katkum ka aiñ ka District Council, kin ym lah ban pdiang satia.
“Na ka liang jong ngi ka PCI, ha kane ka jingïalang ngi la kham kren bha haba ïadei bad kino-kino ki jingpynslem ïa ka jingaplai pynrung kyrteng, ban pynthymmai katkum ka FCRA. Kiwei pat ki nongshim bynta ruh ki la pynpaw ïa kajuh ka jingeh,” la ong u Rev.Socratis Diengngan.
Halor ki jingdon jingem, u la ong, “Ngi ïoh ïa ki jingdon jingem tang khyndiat lyngba ki jingai sngewbha ba la lum lyngba ka seng. Ngi la ong ba ngim lah ban aiti ïa ki jingdon jingem jong ngi. Khamtam ha Meghalaya kaba hap hapoh ka jingkhmih ka Autonomous District Council”.
Na ka liang ki nongïalam ka PCI ki la kyrpad ïa ka JPC ba kan pyrkhat bha ïa ka Amendment Rules 2026 bad ban pyndam noh ïa ka Amendment Bill.
Ki nongïalam ka PCI kiba la leit sha kane ka jingïalang ba la long ha Nongbah Shillong, ki long u Rev.Socratis Diengngan, Chairman ka FCRA Committee, Rev. H.L Myrsing Moderator PCI bad Rev.S.T Kaia Senior Administrative Secretary, PCI.
