Shillong, Naiwieng 02
U Myntri Rangbah ka Jylla u Conrad K. Sangma, u la ong ba ha kine ki shisngi ar sngi un sa shim ïa ka rai halor ka tnad treikam (Portfolio) ba yn bynshet ha u Bah Paul Lyngdoh bad pynshai ruh ba ym don kano-kano ka jingthmu ban pynhiar shuki ïa ki dkhot kiba don ha ka kynhun Myntri (Cabinet) jong ka Sorkar ïa mynta.
U Bah Paul, u dei u nongmihkhmat jong ka West Shillong Constituency, u la shah pynbam smai kum u Myntri Sorkar ha ka sien kaba ar ha ka Sorkar MDA-II, bad kane ka jia long hadien ba u la leit ban pynïasoh sha ka National People’s Party (NPP) ryngkat ki ar ngut ki MLA jong ka United Democratic Party (UDP).
Ïa u Bah Paul la pynbam smai da u Lat ka Jylla u C.H Vijayashankar ha ka jingïadonlang u Myntri Rangbah ka Jylla u Conrad K. Sangma, ki arngut ki Symbud Myntri Rangbah ka Jylla u Bah Prestone Tynsong bad u Bah Sniawbhalang Dhar lem kiwei ki Myntri Sorkar bad ki heh ophisar Sorkar.
Haba kylli, la u Bah Paul un wan biang kum u Myntri jong ka kam jngohkai pyrthei, u Conrad u la ong, “Ngan sa shim ïa ka rai haba ïadei bad kane ha kine ki shi sngi arsngi, ailad ïa nga ba ngan leh ïa kane bad ynda haba la dep ban rai ïa ka tnad treikam ban bynshet yn sa pynbna bad ïa kane ka rai yn sa shim ha ka por kaba biang.”
Shuh-shuh haba jubab ïa ki jingkylli u Conrad u la ong, “Ha ka saiñpyrthei, bun kiei-kiei ki lah ban jia. Ngim shym la mutdur ba kum kane ka jinglong jingman kan jia, hynrei ka la jia. Kumta ngam lah ban ong ba ym don shuh kaei-kaei, hynrei ha ka jinglong jingman kaba ju long, ngim khmih lynti ba kan don shuh kano-kano ka jingkylliang Myntri. Ngi khmih lynti ba kane ka Sorkar ryngkat bad kine ki Myntri kan pyndep ïa ka samoi treikam jong ka.”
Haba kylli la kan dang don ka jingpynrung shuh ïa kiwei ki MLA ha ka kynhun Myntri, u Conrad u la ong, “Lada nga don ka lad ban pynrung Myntri thymmai sa 5 ne 6 ngut bad lada ka riti pynïaid kam ka Ri ka shah, lehse yn sa pyrkhat ban pynrung shuh ïa kiwei pat, hynrei katkum ka riti synshar ka ailad tang khyndiat ngut ban don ki dkhot ha ka kynhun Myntri bad kumba la don 12 ngut ngi hap ban ïatrei kumta” u la ong.
