Shillong, Naiwieng 02
U Myntri Rangbah ka Jylla u Conrad K. Sangma ha ka sngi Nyngkong u la pynthikna ba ki lai ngut ki MDC ba mynta na ka TMC kin pynïasoh pura noh sha ka NPP ha ka 4 tarik mynta u bnai.
“Ngin sa ïoh sa ïa ki lai ngut ki MDC ba mynta na ka TMC ki ban pynïasoh bad ngi ha ka 4 tarik mynta u bnai. Kumta ïa kane ngin sa ïakren ha ka 4 tarik. Ale ngin ïakren shwa ïa kaei kaba jia mynta ka sngi,” la ong u Conrad haba kren sha ki nongthoh khubor.
Haba kylli halor ki khubor ba ki MLA ka TMC ruh kin pynïasoh sha ka NPP, u Myntri Rangbah u la jubab, “Hato phi kren na ka bynta jong ki?”
U la pynshai ba kam shym la don satia kano-kano ka jingïakren ne jingtyrwa kaba la wan sha u na ki MLA ka TMC.
“Kam shym la don kano-kano ka jingïakren kaba la wan sha nga. Ngin ap bad peit shwa ïa ka jinglong jingman kumno kan long. Ïa mynta, ka prokram ka ban long ha ka 4 tarik ka long kaba la thikna, ki MDC jong ka TMC kin wan ïasoh bad ngi,” u la bynrap.
