Shillong, Naiwieng 08
Ka Khasi Students Union (KSU) hapoh ka jingïalam u Samla Reuben Najiar, General Secretary haryngkat ka jingdonlang u Samla Pynkmenlang Sanmiet, Vice President, ka la leit ban jngoh bad ai jingkyrshan ïa ki longkmie ka Joint Action Committee (JAC) kiba dangpynlong ka jingïakhih shongkyllaiñ mungor hajan Civil.
Nalor ka KSU CEC, la don lang ruh ki nongïalam ka KSU Laban Circle hapoh ka jingïalam u Samla Jason C. Laloo, President bad ki dkhot ruh kumjuh.
Haba kren sha ki lad pathai khubor u Samla Jason C Laloo u la ong ba ka seng hi ka pynrem jur ïa kane ka jingleh ka Sorkar, ka bym sngap ïa ka jingdawa ki longkmie na Laban.
U la ong ban ïohi ba ki Kmie kin mih ban ïakhih, ka pynsngewsih haduh katta-katta, khamtam ïa ki Samla na Laban Pyllun baroh kawei.
“Ka long kaba don nongrim bha halor ka jingmih shakhmat ki longk ie ban ïakhih halor katei ka projek Ropeway ha Lum Shyllong, namar ba kan sa ktah ïa ka mariang bad wat ki mrad ruh kin sa lah ban duh jait noh na kane ka thaiñ jong ngi,” la ong u Samla Jason.
“Ka seng ka pynrem jur ïa ka Sorkar, ba ka sngap mynthi ïa kane ka jingdawa ba shong nongrim jong ki longkmie ka Laban. Bad ngi don shisha ka jingsngewkhia ba ki longmie kin thiah miet ha Civil, namar mynta ka ladei ka por tlang, bad lada jia kaei kaei ïa kine ki longkmie, mano ban bah khlieh,” u la ong.
Namarkata, u la bynrap ruh “Ngi ngeitskhem ba ka Sorkar kan shimkhia noh mardor ïa kine ki jingeh bad jingdawa ki longkmie ka JAC”.
U Samla Jason u la ïathuh ruh, haba ki la wan ban kynduh ïa ki longkmie, ki la sngap bad ïoh shibun ki jingpynshai bad na ka liang ka KSU Laban Circle, kin sa leit ban ïakynduh ïa ki nongïalam shnong bad ïoh ka jingshai, khnang ba ka shnong kan long kawei.
