Shillong Naiwieng 08
U MP barim ka Rajya Sabha u Dr Wanweiroy Kharlukhi dang ha kine ki sngi sngi u la buh ïa ka jingkyrpad hakhmat ki nongthep vote ha Dawki ban jied ïa u kyrtong ka Congress Bah Vincent H Pala lada ki kwah ba ka jingtih dewïong kan bteng bad jied ïa ka Prah jong ka VPP lada ki mynjur ban pynsangeh noh.
Haba ai jingkren ha ka jingïalap ilekshon ha Dawki ha West Jaiñtia Hills district na ka bynta u Bah Pala hashwa ka ilekshon MP shiteng samoi sha Shillong Lok Sabha, u Dr Kharlukhi u la ong, u la ju rah beit ïa ka mat tih dewïong ha Parliament bad pyrshah ïa ka National Green Tribunal (NGT).
“Ha ka 20 tarik u Nohprah, 2025, nga la kren ha Parliament, nga la pynmih ïa ka sur pyrshah ïa ka NGT, nga la kylli balei ban khang tih dewïong, namar ka long kumba phi khang ïa ka pliangja jong ki paidbah,” u la ong.
“Ki pynksan da kaba ong ba ki khang ïa ka jingtih dewïong namar ba ka um na u dewïong ka pynjaboh ïa ki wah kaba ïalam sha ki dohkha kiba ïap, hynrei phi tip ïa ki karkhana ha Delhi bad kiwei kiwei ki bynta jong ka ri India, katno ngut ki khyllung ki ïap ha ka shisnem, da ki lak ngut ki khyllung ki ïap namar ka jingjaboh na ki karkhana, te balei ban khang tang ïa ka Meghalaya namar kane ka jingkhang tih dewïong kynsan kynsan, ka pyni ba kim kheiïkor ïa ngi,” u la ong.
U Dr. Kharlukhi u la ong ba u Bah Pala un trei shitom ban pynbeit ïa ka jingeh jong u dewïong bad ban pynim biang ïa ka ïew ka hat.
“Ha ki social media ki la ong ba u Dr Kharlukhi u la sdang ban kren shaphang ka mat dewïong hadien ba um dei shuh u MP, nga sngew ba nga dei ban ïathuh ïa kine ki samla, kiba dang shu sdang ban long nongïalam, ba lada phim tip kumta, sngewbha wat pule bad wad jingtip ïa kata. Lada phim tip, sngewbha wat sdang ïa ka kam jong phi kum ki nongïalam saiñpyrthei kiba thok,” U la ong.
“Nga la long u President jong ka Jaiñtia Students Union, ngam ong ba nga dei u riewkhuid namar ba ym don ba hok ha kane ka pyrthei, hynrei tang kane, i mei bad i pa ki la hikai ïa nga ïa kane, khun ïaid beit ïa ka lynti kaba dei ha ka jingim,” u la ong.
U Dr Kharlukhi, u la kdew ïa ka kaiphod, kaba la pynmih ha ka 28 tarik Ïaïong, 2025, ban kynnoh ïa ka VPP, ba ka pyrshah ïa ka jingtih dewïong.
“Balei nga rah ïa kane ka mat, kane ka dei ka kaiphod ba la pynmih ha ka 28 tarik u Ïaïong, 2025, kaba pynpaw ba ka VPP kaba ki paidbah ki ieit eh ka long pyrshah ïa ka jingtih dewïong. Ka VPP ka pyrshah ïa ka jingtih dewïong bad dawa na ki bor synshar jylla ban leit jngoh ïa ki jaka tih dewïong ban sangeh noh ïa ka jingtih dewïong. Kaba kham pynduh mynsiem ka long ba ha East Jaintia Hills, la kurup 6 hajar matric ton la kurup da ki bor synshar jylla na kito ki briew kiba tih ïa u dewïong, kaba la wanrah ïa ka jingduhnong da ki lak tyngka,” u la ong.
“Hato ym dei ma phi kiba leit kylleng kylleng bad kam ba phi ieid ïa ka jaidbynriew. Nga buh ïa kane hakhmat jong phi ba lada phi dang kwah ba ka jingtih dewïong kan bteng, te jied ïa u Pala, u kyrtong ka Congress, bad lada phi mynjur, kumba ong ka VPP, ban sangeh noh ïa ka jingtih dewïong, te jied ïa u Prah tangba wat babe pat hadien ban ong ba ngi la leh bakla kaba khraw,” u la ong.
“Balei nga kyrshan ïa u Bah Pala, ka dei namar ba u ruh u long kum ma phi kiba tih dewïong, u don la ka jong ka par dewïong ha ki thaiñ Sutnga bad nga tharai wat ma u ruh, un pyrshang ban plie biang ïa ka jingtih dewïong. Ngi kum ki briew, ngi donkam ban im. Hooid, ki ong ba kan ktah ïa ka mariang, hynrei ïa ka mat, dei ban ïakren, ym tang ban pynjari ïa ka ban khang noh hynrei kine ki ar tylli ki mat ki biang ban pynngeit ïa phi,” u la ong.
U la ong ba u dewïong u la pynlong riewspah ïa ka rilum Jaiñtia bad Meghalaya, bad ka jingkhang ïa u ka la ktah ïa ki hajar tylli ki longïing.
