Shillong, Naiwieng 08
Ka jingkhang jong ka Congress ka plie na ka bynta u Bah Charles Pyngrope, hynrei u khlieh nongïalam ka seng, Bah Vincent H. Pala u kwah ïa u ba un rai shisien rai bad ba un um phai dien ne kylla ktien shuh.
U Bah Pala u la ong ba u Bah Pyngrope na ka por sha ka por u la kular ban kyrshan ïa ka Congress, hynrei tang ban kylla ktien noh pat hadien.
“Ngi pdiang sngewbha ïa u Bah Charles Pyngrope,” la ong u Bah Pala.
“Ha ka sien kaba la dep, nga la ïakynduh hi dalade ïa u bad u la mynjur ban kyrshan ïa ngi bad u la phah ruh wat ïa uwei u kyrtong ha ka ilekshon MDC ban ïakhun na ka bynta ka Congress bad baroh ngi la kyrshan ïa u, hynrei ha ka ilekshon MP u la mynjur ban kyrshan hynrei u la kylla jingmut, u la kyrshan ïa ka NPP, bad mynta ruh dang shen nga la leit sha u, u la ong ba un kyrshan ïa nga, kumta ngam tip.”
Namar ka jingïapher ha ka jingïalong la ka jong hapdeng u Bah Pyngrope bad u Dr. Mukul Sangma, u Bah Pala u la kubur ba um lah ban ïathuh lypa kaei ka ban sa jia hadien.
“Namarba ma u bad u Dr. Mukul ki ïa ïaid la-la ka jong ka lynti bad bunsien kim ju da kham don lang ïa kajuh ka jingmut, kumta ngam lah ban ong, hynrei ngan kmen eh lada u wan sha ka Congress bad ngan sngewkmen ruh lada u kyrshan ïa nga,” u la ong.
Haba pynpaw ka jingsngewburom jong u ïa u Bah Pyngrope, u Bah Pala u la ong ba u (Pyngrope) long uba sbun bad ba heh mynsiem, uba bna-nam bad uba lah ban trei, hynrei u la ong ba tang kita ki jinglong kin ym lah ban pynwandur ïa ka lawei kaba la tei halor ki jingshaniah kiba kylla.
“U Bah Charles u dei u briew uba bha, u ju long uba sbun barabor bad ki briew ki ieid ïa u, hynrei lada u ïai kylla ïa ka jingmut jong u bad ïai kynriah seng, nga tharai suki-suki, u ruh un mad ïa kajuh ka jingshem kumba long kem kiwei pat ki ‘riewsaiñ pyrthei kiba shu pynkut noh ïa ka lawei jong ki khlem kano-kano ka jingnoh synñiang sha ka imlang-sahlang,” u la ong.
U la ong ba ïa u ‘riewsaiñ pyrthei dei ban bishar ha ka nongrim ba u ïeng bad ka jinglong ba ïaineh, kynthup ha ka rukom kynriah seng jong u.
“Kum u ‘riewsaiñ pyrthei, ngi dei ban long kiba skhem ha ka nongrim jong ngi, ngi dei ban long kiba skhem ha ka jinglong jong ngi, ki rukom leh, ki rukom kynriah seng ruh kumjuh, nga pyrkhat ba ka jinglong hok bad ka nongrim, nga tharai ba ngi hap ban pynneh,” u la ong.
“U Bah Charles u la don bad ka Congress, kaei kaba u la kren mynshuwa, nangta pat u kylla, kumta kata ka ktah ïa ka jinglong ba janai jong u, bad nga sngew ba un um lah ban ïai bteng ban kylla nalor kata, kumta u hap ban pyrkhat bha,” u la bynrap.
U Bah Pala u la ong ba u ïai bteng ban burom ïa u Bah Pyngrope bad kheiñ ïa u kum uta uba lah ban long u nongïalam hadien-habud, hynrei u la kyntu ïa u ban jied ïa ka jinglong hok ban ïa ka jingbym lah ban shim rai.
“Na ka bynta jong nga hi shimet, nga tharai ba nga burom ïa u Bah Charles bad nga ïohi ba u dei uwei na ki nongïalam jong ka Jylla jong ngi ha ka lawei, u don ïa ka jingtbit, u don ka jinglah ban leh ïa kata, hynrei sa shisien ha kine ki sngi ba mynta ha ryngkat kane ka jingkylla, ngam tip, teng-teng lada phi shida eh kum u briew, phi lah ban leh bakla, bad lada phi long uba sniew palat ruh, phi lah ban leh bakla, phi hap ban long tang u briew uba ïeng ha ka jingshisha,” u la ong.
