Shillong, Naiwieng 08
Ha ka shnong Langñiuh bad ki shnong ba marjan kiba hap hapoh ka Mairang C&RD Block, Eastern West Khasi Hills District, ha ka 08 tarik u Naiwieng, 2026, u slap uba jur ryngkat bad u phria ki la wan lynshop bad pynjulor ïa ki pynthor kba jong ki nongrep, ha kaba ki soh-kba ki la hap lut.
Katkum ka jingïoh lum jingtip, kane ka jingjia ka la jia naduh ka por 1 baje duna mynsngi haduh ka por 2 baje mynsngi, ha kaba u slap bad u phria ki la neh kumba jan shi kynta, hynrei ka jingktah ka la long kaba jur bha ïa ki lyngkha rep.
Kane ka jingjia ka la wanrah ïa ka jingsngewsih bad jingkhuslai kaba khraw ïa ki nongrep, namar ba la jan poi ka por ban ot ïa u kba, hynrei ha ka jaka ban ïoh ïa u soh jong ka jingtrei shitom, ki la mad pat ïa ka jingduh kaba khraw na ka jingpynjulor jong u slap bad u phria.
Ki nongrep ki pynpaw ïa ka jingsngewkhia halor kane ka jingduhnong, namar ba ka jingtrei shitom jong ki la bun bnai ka la sepei noh ha ka shi kynta ka jingwan lynshop kynsan jong u slap bad u phria ba jur.
Namar kata, ki nongrep ki kyrmen bad khmih lynti ba ka Sorkar Jylla kan phai khmat sha kane ka jingjia, ban phah jurip ïa ki pynthor kiba la shah pynjulor bad ban ai jingïarap kaba biang ïa ki nongrep kiba la mad ïa kane ka jingjia ba sngewsih.
