Shillong, Naiwieng 08
Ka Khasi Jaintia Deficit School Teachers Association (KJDSTA) ka kynnoh ba ka Sorkar Jylla ka pyrshang ban pyntlot bor ïa ka Deficit System ha ka Jylla, ïa kaba la pynpaw ba kane kan ktah bad buh jingeh kaba khraw ïa ki samla pule bad kan ktah jur ruh ïa ka pule puthi ha ka Jylla baroh kawei.
U Babu Boswel S Pala, President ka KJDSTA haba kren sha ki nongthoh khubor hadien ba wai ka Annual General Meeting 2026 ba la long ha Sacred Heart Boys’ Higher Secondary School ha ka sngi Saitjaiñ, u la ong ba ka Sorkar ka pyrshang ban pynduh jubor ïa ka Deficit System da kaba ïaleh ban thep jubor ïa ka Structured Pay Framework (SPF), ka Composite Grant bad kumta ter-ter.
“Watla ka Sorkar ka ong ba ka khlem mut ban pynduh lane pyntlot bor ïa ka Deficit System ruh ngi lah ban ong ba ka Sorkar ka ïaleh ban pyntlot da kaba pynrung ïa ka Structured Pay Framework (SPF) bad ka Composite Grant” u la ong.
Shuh-shuh u la ïathuh ba ki la don ki skul kiba khlem pynbna paitbah lane Advertise ïa ki kam ba lait hapoh jong ka Deficit System, kane ka jingleh ka pynduh mynsiem bad ka pynduh jingkyrmen ïa kiba bun ki khun samla kiba don ka jingangnud ban long ki nonghikai ha ka Jylla.
“Ka jingweng ïa ka Deficit System kan dei beit ka jingktah kaba jur ïa ki khynnah skul jong ngi kiba mynta bad ki ban sa wan hadien khamtam ki samla kiba don ka jingthmu ban rung sha ka kam hikai, ngim lah ban len ba ka jingdon ka Deficit System ka la ïarap shibun haba ïadei ka jingsiew bad kiwei ki jingmyntoi” u la ong.
U Babu Boswell u la pynpaw ruh ka jingsngewkhia ba lada ka Deficit System kan duh noh kan ktah ïa ki khynnah pule kiba wan na ka longïing longsem ba kham duna ka ïoh ka kot, namar ka bai skul kan rem bad kiewdor bad kane kan sa long ka jingktah kaba jur ïa ka pule puthi ha ka Jylla baroh kawei.
Haba ïadei ka Central Provident Fund (CPF), ka National Pension System (NPS), ka Arrear jong ka Dearness Allowance (DA) bad kiwei-kiwei ki jingmyntoi ba ki nonghikai bad ki nongtrei kiba hapoh jong ka Deficit System ki dawa ban pynbeit noh kham kloi, u Babu Boswell u la kynnoh ba ka Sorkar ka leh shalai bad leh kyllaiñ da kumne kumtai khlem da pynurlong ïa ki jingdawa, kumta na ka liang ka kynhun ka la shim ïa ka rai ban pynlong da ki prokram ïakhih nangne shakhmat.
U la bynrap ba ka Sorkar dang shen ka ong ba ka haba ïadei ki jingdawa ki nonghikai ki dei ban wan ban ïakren u Babu Boswell ula ong, “Mynno te ba ngim ïakren, la shi snem mynta ngi la ïakren shi ïakren hynrei kam poi shaei-shaei, ka shu kren kyllaiñ da kumne kumtai, haba ïakren te dei ban ïa kren ïa kaba dei ban leh keiñ”.
