Shillong, Naiwieng 08
Watla ka UDP ka la mih noh na ka Sorkar MDA-2 ba la lamkhmat da ka NPP hynrei ka jingïadei paralok ka UDP bad ka HSPDP ha ka kynhun Regional Democratic Alliance (RDA) ka dang skhem haduh mynta.
Haba ïakren bad u Bah Titosstarwell Chyne uba dei u General Secretary ka UDP Sengkmie u la ïathuh haba ka UDP ka la mih noh na ka Sorkar MDA-2 kim shym la pyntip ïa ka HSPDP kaba ïadei paralok ha ka RDA.
U la ïathuh watla ka UDP ka la mih noh na ka Sorkar MDA hynrei ka jingïadei paralok ha ka kynhun RDA ka dang bteng haduh mynta.
U la pynkynmaw ba ha ka jingpynkhreh ïa ka ilekshon MP Lok Sabha ka UDP bad HSPDP ka la ïaid la ka jong namar ki don la ki jong ki nongrim.
Kumban shu pynkynmaw ba ïa ka RDA la thaw ha ka por ba u Dr. Donkupar Roy (bam kwai ha dwar U Blei) u bat kum u President ka UDP bad Bah Ardent Basaiawmoit kum u President ka HSPDP ha u snem 2017 ban wanrah ïa ka jingïatreilang ki seng riewlum ha ka ilekshon MLA ha u 2018, hynrei kine ki ar seng kim shym la ïoh bun ngut ki MLA namar ka UDP ka jop tang hynriew ngut, ka HSPDP ka jop tang ar ngut.
Haba ka RDA ka jop tang 8 ngut ki MLA ka la dei ka kynhun kaba khlaiñ ban rai ban leit kyrshan ïa ka Congress ne ïa ka NPP hynrei ha kaba khatduh ki la jied ïa ka NPP ryngkat ki jingïoh bhah Myntri na ka UDP bad HSPDP.
Haba ka UDP ka la sah sa tang marwei hadien ba ki 11 ngut ki MLA ki la phet noh, u Bah Metbah Lyngdoh uba dei u President u la hiar shuki noh kum u Myntri bad ka UDP ruh ka la rai ban mih noh na ka Sorkar.
Katba ka HSPDP kaba dang don tang ar ngut ki MLA ka dang ïai don bad ka Sorkar haduh mynta namar u Bah Methodius Dkhar u dang bteng ban bat ïa ka kam Myntri.
Hadien ba u Bah Metbah Lyngdoh u la hiar shuki noh kum u Myntri ka Sorkar Jylla, u Myntri Rangbah ka jylla u Conrad K Sangma u la thung bujli ïa u Bah Paul Lyngdoh hadien ba u la rung sha ka NPP.
