Narendra Modi
U Lal Krishna Advani u la rung mynta ha ka snem ka ba 100 jong ka jingim ka jong u, ha ka 8 tarik u Naiwieng. Ha kane ka snem, ka sngi kha jong u ka hap ha ka sngi rakhe ïa ka Diwali, kaba dei ka aiom lehkmen kaba ïahap ruh bad u Prabhu Shri Ram bad ka jingshai jong ki Diya, ka por ba rakhe ïa ka jingdap 75 snem naduh ba seng ïa ka Jana Sangh, ka jingdap 125 snem jong ka sngi kha jong u Dr. Syama Prasad Mookerjee, bad dang shen ngi la rakhe ïa ka jingdap 100 snem jong ka RSS.
La kha ïa u Advani ha ka 8 tarik u Naiwieng, 1927, ha ka sngi Dev Deepawali. Ha ka jinglong samla jong u ha u snem 1947, u la mad ïa ka jingsngewsih ha kaba u hap ban ieh noh shadien ïa ka jinglong jingim kaba ha Sindh. U la tei biang ïa la ka jingim naduh tynrai, khlem da don kano kano ka jingsngewsih. Kane ka jinglong jong u, ban sdang biang naduh tynrai wat hapdeng ki jingeh baroh, ka la ïaineh ha shilynter ka jingim jong u. La sakhi ïa kane mynba u dang pynkhlaiñ ïa ka Jana Sangh bad hadien pat haba u la sdang ïa ka BJP. Ha ki por ba u bat ïa ka kam kum u President ka BJP, ka Congress ka la mad ïa ka jinghiar kaba jur ha ka jingdon ki seat, na ka 400 sha ka 200 duna ha u snem 1989, bad ka BJP ka la kylla long kawei na ki seng saiñpyrthei kaba bun tam ha ka sien kaba nyngkong ha u snem 1996. U Advani u ïalam ïa kiba bun ki pateng jong ki Karyakarta bad u la pynlong ïa ka party, ban pynshong nongrim ha kaban buh shuwa ïa ka ri hakhmat kiei kiei baroh.
Ar tylli ki jinglong kiba pynïapher ïa u Advani kum u nongïalam. Kaba nyngkong ka long ka jingshai ha ka rukom pyrkhat, bad ka jingstad bad ka jingskhem jingmut ha ka pyrkhat pyrdaiñ. Kane ka la paw lyngba ki jingkren bad ki jingthoh jong u. Ki rai jong ka Jana Sangh bad ka BJP kiba u la thoh, ki dang long kiba donkam ban pule wat haduh kine ki sngi, bad ki jingïakren ki jong u lyngba ki interview ki ju long kiba bniah, kiba shai bad kiba tikna. Kaba ar ka long ka rukom pynpaw bad thad ïa ka jinglong arsap bad leh mynleh kum kaba pdiang bad shah laitluid ïa baroh ki jait niam, da kiba bun ki nongïalam saiñpyrthei jong ka India la bun bun snem.
U Advani u la shim ïa man la kawei pa kawei ka kamram da ka jingminot bad ka jingkitkhlieh kaba khraw. Kum u RSS Pracharak, u Advani u la sdang ban trei nyngkong ha ki bynta bapher bapher jong ka Rajasthan. Nangta, u la leit sha Delhi, ha kaba u la sdang ban don ka jingïatrei kaba ïajan bha bad u Atal. Ka histori ka pyni ba ka long kaba pher ban shem ïa ar ngut ki nongïalam saiñpyrthei kiba paw ban ïatreilang da ki phew snem, ka jingïatreilang ka bym don kano kano ka jingïapher ne ka jingïa aireng pyrshah iwei ïa iwei pat. U Advani bad u Atal ki la pyni ïa ka nuksa kaba kyrpang bad da ka jingïatreilang, ki la pynkylla ïa ka rukom long jong ka saiñpyrthei ha India.
Ka Delhi kaba u Advani u la poi ka dang ïakynduh ïa ka jingma ba shyrkhei jong ka jingpynïaphiah. U la aiti lut ïalade ban pynkhlaiñ ïa ka Jana Sangh. Ha u snem 1967, u Advani u la long u Chairman jong ka Delhi Metropolitan Council, ha kaba u la trei ryngkat bad u (L) Vijay Kumar Malhotra, uba la long kum u Chief Executive Councillor.
Ha u snem 1970, la sdang ka jingïaid lynti jong u Advani ha ka Ïingdorbar Thawaiñ. Ki jingnoh synñiang, ki jingkren, bad ki jingïashimbynta jong u ki la ïoh ïa ka jingïaroh na ki seng saiñpyrthei bapher bapher. U la pynsahdak ïalade kum u dkhot ka Ïingdorbar Thawaiñ (MP) bad hadien kum u Nongïalam ka Liang Pyrshah ha baroh ar tylli ki ïing ïasaid aiñ bad kumjuh ruh na ka liang jong ka kynhun ba thaw Sorkar. Watla hapdeng ki jingkitkhlieh babun kum u nongmihkhmat, u ju poi ruh sha kylleng ki bynta jong ka Ri India ban ïakynduh bad ki briew.
Nga kynmaw byrngut byrnget ïa ka jingïakhun elekshon sha ka ïingdorbar Lok Sabha jong u snem 1991. La rai ba u Advani un sa ïakhun ïa kane ka elekshon na ki artylli ki jaka, kawei na kita kaba long ka nongbah Gandhinagar. U don ka jingïasnoh ba la rim bha bad ka Gujarat. U Kpa jong u, u la shong shnong ha Kutch hadien ka jingpynïakhlad jong ki bynta ka Ri. U Advani u la shakri ruh kum u MP ka Gujarat sha ka ïingdorbar Rajya Sabha. Kumta, kane ka long kum ka jingsngew jong ka jingwanphai sha la ka ïing hi. Namar ka jingïadon lang ha ka Seng BJP, nga la ïoh ïa ka lad ban ïarap ïa u ban pynkhreh ïa ki kot ki sla bad ban leit synran ïa u ha ka jingïalap elekshon baroh kawei. Ki briew jong ka Gandhinagar ki la phah ïa u sha ka ïingdorbar Thawaiñ na ka por sha ka por. Kum u nongthep vote jong ka Gandhinagar, nga ruh nga la ïoh ka lad ban kyrshan ïa u Advani, ha ki jingïashem bad ki prokram bapher bapher. Ka jingaiti bad ka jingpynleit jingmut kaba u la ai sha ka Constituency jong u ka long kaei kaei kaba ngi dei ban ïoh jinghikai.
U Advani u la long u Nongïalam ka Liang Pyrshah uba shitrhem bha, bad kumjuh ruh u Nongpynïaid ïa ki kam sorkar uba tbit bha. Ha ka por ba ka sorkar Janata ka wan ha ka bor ha u snem 1977, u Advani u la kylla long u Myntri ba peit ïa ka tnad Minister for Information and Broadcasting. La ju pdiang salonsar ba ki kam jong u ha kane ka tnat ki long shisha kiba donbor bad kiba ktah ïa ki jingmut jingpyrkhat jong ki briew baroh. Kum u Symbud Myntri Rangbahduh ka Ri bad kum uwei na ki Myntri Kam Pohïing ba la shakri la slem bha, u la don ka bynta kaba kongsan bha ha kaban pynkhlaiñ ïa ka rukom treikam jong ki tnat pahara bad ka jingïada ïa ka ri India. Ki kam jong u ha kaban pynbha ïa ka jingim bad ka jinglong jingman jong ki bor ïada la ju kynmaw da ka jingsngewieit kaba khraw. Ka nongrim kaba skhem bad kaba shai jong u pyrshah ïa ki kam lehnoh ka la pynlong ïa ka India ba kan don ïa ka aiñ kaba tyngeh pyrshah ïa ki kam lehnoh.
U Advani hi barabor u ïai bteng ban pynneh ïa ka jingïadei bad ka lariti ne ka kolshor jong ka jaidbynriew Sindhi. Sa kawei pat ka sienjam kaba u la shim ka long ban pynpawnam bad ban pynsaphriang ïa ka rukom lehñiam kaba la tip kum ka Sindhu Darshan Puja ïa kaba ju pynlong hajan Leh. Nga ruh nga la ïoh ban leit sha kawei na kine ki jinglehñiam Puja ha ryngkat bad u Advani lem bad u George Fernandes.
Kum u briew uba la heh la san ha Karachi, u Advani um shym la lah ban mutdur satia ïa ka lynti kaba ka jingim jong u kan shim ne ïalam. Kum ka dak jong ka jingsngewnguh, ki paidbah bad ki nongshong shnong ka Ri India ki la pynkup burom ïa u da ka khusnam kaba khraw tam ha ka Ri ka Bharat Ratna ha u snem 2024. Katba u Advani u la nang jan ban kynjoh sha ka rta ba 100 snem jong u, nga duwai ba un nang ïoh ïa ka met kaba koit ba khiah bad ba un dang bteng ban ai mynsiem ïa ngi kang baroh, kumba u la ju leh barabor.
