Shillong, Naiwieng 08
Ha kawei ka jingjia shoh briew kaba la don ruh haryngkat ka jingujor ejahar na kawei ka longkmie, ka la paw ka kyrteng jong u Secretary Shnong ka Shnong Wahthapbroo halor kane ka jingjia.
Ha kane ka ejahar ba la ujor da kawei ka longkmie kaba la tip kyrteng kum ka Kong R Lyngdoh Lyngkhoi ha Lumdiengjri Police Station bad la thep ha ka 06 tarik u Naiwieng, 2026, kaba ka jingkynnoh ka long ba u Secretary ka Dorbar Shnong Wahthapbroo, u Rocky Dkhar, u la shoh ïa u kurim jong ka haduh ba un da mynsaw.
Katei ka FIR ryngkat ki bahaïing uba shah shoh la ong, ba ka la jia ha ka por 1 baje mynstep ha Wahthapbroo ha ka 06 tarik u Naiwieng, 2026, bad ha ka jingshah shoh ha u Bah Rocky, u Bah Freddy u la mynsaw ha ki khmat, ka shyntur bad at baroh kawei ka dur-khmat.
Haba ïakren bad ka hynmen u ba shah shoh ha ka janmiet jong ka 07 tarik u Naiwieng, 2026, ka la ïathuh ba ki pulit kim shym la shimkhia ban pynngat kyndon ïa u nongshoh. Ka la ong ba ha katei ka step synñia, u para jong ka u dang wan bad ki paralok na kawei ka ïing briew bad haba la poi ha katei ka jaka, u lap ïa kiwei pat ki paralok kiba shongkai.
Kumta u la shongkai shuwa bad kine kiwei ki paralok bad hangta la wan u Bah Rocky uba la ong ïa u, ban leit pynthied kyiad hynrei u Bah Freddy u la ong, ba u dei u ei ban leit pynthied kyiad bad nangne ka la mih ka jingïaktah kti. “Kat u Secretary Shnong, ha jingshisha u la dei ban sneng ïa ki khynnah dong, ba kim dei ban shongkai ba ka por ka lah miet, hynrei ma u hi uba dei u nongïalam shnong, un shoh ïa ki khynnah dong haduh ban da mynsaw bad ban shim noh ïa ka aiñ ha kti lade te kam ïahap.” la ong ka hynmen.
Ka la ïathuh ruh ba na ka liang u Secretary Shnong, u la pan ban ïa mab noh halor ka jingjia, hynrei ka ong ba kan hap ban peit shuwa ïa u para lade, ba kata ka jingshah shoh kadei malu mala ne kadei kaba la jur, hynrei ka ong ba kam tip ba kan jia haduh kattne, ba u para jong ka un mynsaw jur na ka jingshah shoh ha u Secretary Shnong. Da kaba bynrap ba kam kwah ban shu ïa mab, hynrei dei ban ai da ka FIR pyrshah ïa u Secretary uba la shoh dusmon.
“Kaba sngewsih ka long ba hadien ba la thep da ka FIR, ki pulit ka Lumdiengjri, kim shym la shimkhia haduh mynta pyrshah ïa u Secretary Shnong, u Bah Rocky Dkhar,” la bynrap ka hynmen.
Haba kren ha ki lad pathai khubor, ka kurim u Bah Freddy ka la ong, ba ka sngewkhia ba ka la thep FIR naduh ka 06 tarik u Naiwieng, 2026, hynrei ki pulit kim pat shim sienjam ei-ei haduh mynta.
