Shillong, Naiwieng 09
U President ka BJP Meghalaya u Rikman G Momin ha ka sngi Nyngkong u la ai dak biang ba ki dang bun ki MLA bad ki MDC ba mynta kila wan ban ïakynduh ïa ka seng ban pynïasoh bad ïa ka rai kaba khatduh yn sa shim hadien ka 15 tarik u Naiwieng hadien ka jingïakynduh bad ki nongïalam ka BJP ha Delhi.
U Rikman u la ong ba ka seng kala jam shaphrang na ka jingkiew ka nombor sha ka kam, ha kaba ka Coordination Committee na ka bynta ki 4 tylli ki mat jingdawa kiba kongsan yn sa pynbna noh tang hadien ba kila wan na Delhi.
“Ka Coordination Committee na ka bynta ki saw tylli ki mat jingdawa kaba la khlieh da u MLA yn sa pynbna hadien ba la wanphai na Delhi,” ong u Rikman. “Ka kynhun jong ka Seng Kmie ka BJP kan sa ïatreilang bad ki MLA jong ka Coordination Committee khnang ba ïa kitei ki mat yn lah ban pynbeit noh mardor”.
U la ong ba ka BJP Meghalaya kan leh ïa ka bynta kaba kongsan ha kaban pynbeit ïa kitei ki mat lyngba ka jingkyrshan jong ki MLA ka BJP.
Katkum ka jingong jong u Rikman, ki 8 ngut ki MLA kiba la pynïasoh dang shen bad ka BJP kila leh da ka jingthmu kaba shai kdar, ban pynbeit noh ïa ki 5 tylli ki mat jingdawa kiba kongsan kiba ka Jylla ka mad bad ka jingpynïasoh ka jong ki kala dep ban pynkylla ïa ka jinglong jingman ha Delhi.
“Kane ka long kaba paw shai kdar kumno ki kam kila ïaid sted bha hadien ba kila rung sha ka seng. Ngi lah ban ïohi shai kdar, haduh katno ka Sorkar Pdeng kala shimkhia ïa ngi hadien ba kala don ka jingkiew ha ka nombor,” u la ong.
Une u nongïalam ka BJP ha Meghalaya u la ong, “Ki jingjia kiba bha lah ruh ban ïohi hadien ba ka Coal Committee bad ka JPC Committee kila wan jngoh ïa ka Shillong hadien ka jingkiew kynsan jong ka jingdon ka BJP ïa ki MLA ha ka Jylla.”
U la kyntu ruh ba dei ban weng ïa ka jingsheptieng jong ki kynhun Khristan, da kaba ong, ba ka seng kan ïada ïa ka bha ka miat bad ban shimkhia ïa katei ka mat beit beit bad u Chairman ka JPC ha Delhi.
“Ngin pynthikna ba ka bha ka miat jong ki kynhun Khristan ha ka Jylla kin dei kiba la pynkhlaiñ bad kiba ïoh ïa ka jingpynneh pynsah kaba shisha,” u la ong bad bynrap “Ngin leit ban ïakynduh ïa u Chairman ka JPC ha Delhi ban pynsngew ha u halor ka nongrim kaba ka BJP Meghalaya ka ïeng bad ban ai jingmut ïa kaba bha tam ban lah ban weng ïa katei ka jingeh. Ïa ki mat yn ym lah ban pynbeit khlem ka jingtuklar jong ka BJP ka Jylla”.
“Ki paidbah ki dei ban sngewthuh, ba lada ngi kwah ba kiba bun ki mat yn pynbeit noh bad ki kam pynroi kin ïaid sted, ki paidbah ki dei ban ailad ïa ka BJP ban jop bun ngut hapoh ka ïingdorbar thawaiñ bad ban ïohi ïa ki jingïapher kiba bha ki ban leh na ka bynta ka Meghalaya bad ïa ki paidbah,” u la ong.
