Watla ka la ïaid palat ïa ka shi bnai shiteng hynrei ym pat ïoh sngew eiei satia ba kita ki mat ba la buh hakhmat da ki phra ngut ki MLA barim ka United Democratic Party kiba la dep ban ryngkang sha ka Bharatiya Janata Party kin urlong ne ïaid shakhmat. Hashwa ban ryngkang baroh ki la kren shai ba ka jingkynthih diengkper kan dei beit halor ki mat ba kongsan jong ka Jylla ba dei ban pyntreikam noh hynrei mynta la kynjah jar jar. Shano kita ki mat, hato ki dei tang ki jingkular ban pynbiej ïa u paidbah bad pyntreikam tang katto katne shwa jong ka ilekshon. Ha kaba nyngkong baroh ki la khmih lynti ba kum ka Jylla kan ïoh noh mar mar ïa kawei ne ar tylli ki mat kiba hakhmat eh lada kita ki phra ngut ki la kynthih sha kata ka seng saiñpyrthei kaba ïalam ïa ka Sorkar Kmie kumba la pynpaw.
Ki mat kiba la buh hakhmat da ki phra ngut ki MLA shwa ban kynthih ki long kum ka jingdawa ban pynbeit ïa ka jingeh ba mih na ka kam tih dewïong, ban pynrung noh ïa ka ktien Khasi ha ka Khyrnit ba Phra ka Riti Synshar ka Ri, pyntreikam ïa ka Meghalaya Residents Safety and Security Act bad pynkynriah ïa ka Harijan Colony na Them Iew Mawlong nalor kiwei-kiwei pat. Ngi lah ban sngewthuh ba kine ki mat ki dei kiba la dawa mynta la bun bun snem ym tang da kita ki phra ngut ki MLA hynrei da ka Sorkar Jylla, ki sengbhalang bad kiwei kiwei. Lah ban pynkynmaw ba ki don ki mat ba wat la mynjur da ka ïingdorbar thawaiñ ka Jylla ban pyntreikam noh hynrei ki la shu sahteng kumto, khlem poi shano-shano ne ban ïohi dak eiei wat haduh mynta mynne. Watla ka jingbuddien na ki liang ba bun halor kane ka la ïaid na kawei ka por sha kawei pat, hynrei ym ïoh jubab eiei na ka Sorkar India ba lamkhmat ka BJP.
Ki nongïalam ka BJP ha Delhi ki la ai ka jingkular ban shimkhia ïa kine ki mat, hynrei imat ka dei tang ka jingkular pynbiej ban myntoi ha ka kam saiñpyrthei. Ngi ïohi ba mynta ïa kine ki mat, kata ka jingkren bad pynpaw ka shu urlong tang ha ki jingïalang ïalap ilekshon jong ki katto katne ki seng saiñpyrthei bad kita ki jingïalap bad pynpaw ruh ki long beit tang halor ka kam tih dewïong bad ka ktien Khasi, ha kaba la shu kular ba lada ïoh ka jingjop yn sa pynurlong noh. Hato u paidbah un dang biej ban ngop shi ngop ha kum kine ki jingkular, haba la tip shai ba kan nym poi shano shano bad dei tang ka BJP kaba don ha ka bor synshar ha Delhi kaba lah ban pynurlong lada ka don ïa ka mon ban leh.
Ngin ap sa tang ïa ka por ban peit ba lano kine ki mat kiba la buh kin urlong, hato shwa ka ilekshon jied nongmihkhmat sha ka ïingdorbar thawaiñ ka Jylla ka ban long ha u snem 2028 bad lada kam urlong hashwa kata, ngi hap ban sngewthuh ba kan nym urlong ruh wat hadien kata. Ngi sakhi ruh ba wat na ka liang ka Sorkar Jylla hapoh ka jingïalam jong ka NPP na ka por sha ka por ka la ju pynpaw ba ka la buddien halor ki katto katne ki mat khamtam lei kiba la dep ban mynjur da ka ïingdorbar thawaiñ hynrei kine ruh ki shu sahkut lut kumto khlem urlong kam. Wat halor ka mat them metor kaba na ka liang ka Sorkar Jylla ka la ju kren bad pynpaw ba shen yn sa pynkynriah noh hynrei watla ïaid da ki snem ruh kam urlong satia kata ka jingpynpaw.
