Nongstoiñ, Naiwieng 09
Ka kynhun ïalehkai jong ka Mawlarshong SC kaba la bat teng ïa ka nam lahduh ha ka Super Division jong ka NDSA ha ki snem ba la lah, ka la khur ïa ka jingjop ha ka jingïalehkai phutbol paralok ba la pynlong da ka Shallang Area Traders Association.
Katei ka nam jop ka la wan hadien ba ka la pynliem noh ïa ka Area Lyngngam Combined Team da 3-0 kol ha ka sngi Saitjaiñ jong ka taïew ba la lah ha madan Joplang Higher secondary School.
Watla katei ka jingïakhun ka long tang ka jingïalehkai paralok, hynrei ka la long shisha kaba itynnad bad kaba pynhun ruh ïa kiba bun ki nongwan peit kai, bad ka jingthmu jong ka Shallang Area Traders Association ban pynlong ïa katei ka lympung ka long tang kum shi bynta ban ai mynsiem ïa ki samla don sap ka thaiñ ba kin trei shitom haba ki don ïa ka sap ïalehkai khnang ba kin ïoh ban kheit ïa u soh ha ka jingjop ha ka jingim ka jong ki.
Nangta, kane ka lympung ka long ruh shi bynta ban pyni nuksa ba kum ki briew ki dei ban pynlong ïa ka met kaba koit kaba khiah, bad ruh kum ka jingpynshit pynshngaiñ ïa katei ka sngi ïa kaba ka Shallang Area Traders Association ka ïoh ban pyllait paitbah ïa ka kali kit nongpang, kyrpang sha ki thaiñ nongkyndong ki bym pat biang ïa ki lynti ki synkien.
Ha kane ka sngi u MLA ka thaiñ u Bah Methodius Dkhar uba long ruh kum uwei na ki Myntri sorkar u la long u kongsan, ha ka jingdonlang ruh ki ar ngut ki MLA barim ka thaiñ u Bah Witting Mawsor, Bah Gigur Myrthong, u Bah Sraly Rashir, MDC ka thaiñ, Bah Shiningstar Riangshiang President ka SATA, u Fr. Markus Lakra ka Sacred Heart Parish Shallang uba long ruh u Parish Priest, u Fr. A. Marzo, ki riew rangbah, ki longkmie bad kiwei kiwei kiba la sam ruh ïa ki khusnam sha baroh ar tylli ki kynhun.
