Shillong, Naiwieng 09
U rangheh ksah ka Jylla u Bransley D. Nongkynrih jong ka Iron House Gym, u la wanrah burom ïa ka Jylla hi baroh kawei da kaba u la khur ïa ka takma ksiar ha ka Classic Physique – A Category jong ka NPC Worldwide Kazakhstan Pro Qualifier 2026 ha ka 7 tarik mynta u bnai ha Almaty, Kazakhstan.
Kane ka jingjop ka pyni sa kawei pat ka mawjam kaba kongsan ha ka jingïaid lynti jong u ha ka rynsan pyni dohksah. Hadien ka jinglah ban pynpaw ïa ka jingtbit jong u ha ka Sheru Classic NPC Regional North India Championship kaba la long ha Chandigarh ha ka 11 tarik u Risaw mynta u snem, ha kaba u la ïoh ban khur ïa ka nam lahduh ha baroh ar ki jingïalehkai kata ka Classic Physique bad Bodybuilding, u Bransley u la lah ban bteng ïa ka jingjop jong u sa ha ka rynsan ïakop shabar ri.
Ka NPC Worldwide Pro Qualifier ka dei ka rynsan kaba kongsan na ka bynta ki nongïalehkai (amateur bodybuilders) kiba angnud ban ïoh ïa ka IFBB Professional League Pro Card jong ki bad ban kiew shaphrang ha ki kyrdan ïakop kiba kham paw wat shaduh ka Mr. Olympia.
Ka jingjop jong u Bransley ïa ka takma ksiar ka long ka jingpynshisha ïa ka jingaiti lut met bad mynsiem, ka jinglong ryntih, ka jingtrei shitom ha ka ban pynheh ïa ki dohksah. Kane ka long ruh ka jingsngew sarong ïa ka Iron House Gym bad ïa ka imlang sahlang jong ki nongkilan met jong ka jylla baroh kawei.
Na ka liang u Bransley u pynpaw ka jingsngewnguh kaba khraw ïa ka Dr. M. Ampareen Lyngdoh, MLA jong ka thaiñ; u Païem Ainam Syiem; u kpa jong u, Bah Khrawbok Nongum; baroh ki dkhot jong ka Iron House Gym; bad ki nongkyrshan shimet jong u na ka bynta ka jingkyrshan pisa, ka jingai mynsiem bad kiwei ki jingkyrshan kiba long ki jingplie lad ïa u ha ka ban ïoh leit shim bynta.
U kubur ba ha lyndet kane ka jingjop jong u kan ym lah ban long khlem ka jingkyrshan da baroh.
Kane ka jingjop kam dei tang ka jingjop shimet, hynrei ka long ruh ka jingai mynsiem ïa ki nongïalehkai ka Jylla ba kin don ka jingangnud ba kin don ïa ka jingkut jingmut, ka jingtrei shitom bad ka jingkyrshan kaba biang, khlem pep kin sa lah ban kiew ym tang hapoh ka ri, hynrei wat shabar ri ruh kumjuh.
