Jowai, Naiwieng 09
Ka Musniang SC ka la rung sha ka final ha ka lympung ïalehkai 1st Division Football League- Thomas Nongtdu Memorial Trophy ba la pynïaid da ka East Jaiñtia Hills District Sports Association (EJHDSA), hadien ba ka la lah ban pynliem noh ïa ka Khliehriat West YWSC da 1-0 kol ha ka lah sngi U Blei.
Kane ka jingïakhun semi final ha madan Diengshynrum ha Khliehriat kaba la long kaba itynnad bad kaba ïakhaid bha ha ka rukom ïalehkai, hynrei hashwa ban wai ka Musniang ka la lah ban pynurlong ïa ka jingjop lyngba ka shi kol ba la thep da u Jespar Lamare ha ka minit kaba 90+1.
Ïa ka nam Outstanding Performance la khur da u rangïalehkai ka Musniang u Dasalanwanmi Malang.
Te kumta lyngba kane ka jingjop, ka Musniang SC ka la kiew kyrdan sha ka Super Division, ha kaba kan ïoh ban shim bynta naduh ka aïom ban wan.
Ka Musniang SC kan pynkhreh ban ïaknieh ïa ka nam lahduh pyrshah ïa ka Rymbai Synrangshahkhaiñ SC.
