Shillong, Naiwieng 09
U Bah H.B Nonglang Chairman ka Green-Tech Foundation, uba don bynta lang ha ka jingïakhih ki longkmie ka Joint Action Committee (JAC) ha u motdur u Kiang Nangbah, u la khot ïa ka Sorkar Jylla ban wan shakhmat ban ïatai bad ka JAC halor ki kam bad jingthmu shna Ropeway ha Lum Shyllong.
Kane ka wan hadien ba ka Sorkar kam pat ai kano-kano ka jubab haba ïadei bad ka jingïakhih ka Joint Action Committee Against Shillong Ropeway Project kaba la ïaid mynta la saw sngi lynter.
Haba pynshai halor kane ka mat, u Bah Bansiewdor, u la ong balei ka Sorkar kam sei ïa ka jingshisha haduh mynta da kaba pyni ïa ka kot kaba la thmu ban tei ïa artylli ki ïing building ha ka Lower Terminal bad Upper Terminal katei ka projek, kata kawei ka ïing building kaba 4 mala ha Lower Terminal bad kaba 3 mala ha Upper Terminal.
“Ka Sorkar kam pat pynshai haduh mynta haba ïadei bad ka jingtei ïa ki ‘restaurant’, ki ‘food court’ nalor ki ‘restroom’ ha katei ka jaka,” u la ong.
U Bah H.Bansiewdor Nonglang, u la sei ruh ïa ka kot kaba la pynlong ïa ka ‘public consultant’ kaba la ïashim bynta da 27 ngut ki nongïalam shnong halor katei ka projek, da kaba kdew 80% kiba wan ïashim bynta ha katei ka jingïalang ki la ong ba ym long ban leh ïa katei ka projek ha katei ka jaka.
U la kdew ruh ba ka jingïakhih ki longkmie, kam dei kaba kamkai da kaba pynpaw ba ki hap ban wan ïalam ïa ki khun ha katei ka jaka ban phah khrehkot ïa ki.
“Ka projek ka biang palat hynrei ngi ong ba ka Sorkar ka la wanrah bakla ïa kane ka projek Ropeway ha Lum Shyllong. Lada phi wanrah ki jingtei ban ïoh kam ïoh jam ka bha palat, hynrei balei ban da wanrah ha u Lum Shyllong,” la bynrap u Bah H.Bansiewdor Nonglang.
“Nga kwah ban buh jingkylli ïa ka Sorkar, ba balei haduh mynta kam shym la sei ïa ki jingshisha halor ka jingthmu shna Ropeway ha Lum Shyllong,” u la ong. Da kaba bynrap “Hato ka jingïakhih ki longkmie ka dang dei kaba kai ban shu wan thiah miet ha kane ka jaka, lada kam ktah ïa ka mariang”.
