Bengaluru, Naiwieng:
Ka kynhun Myntri jong ka jylla ka la dep ban mynjur ïa ka jingthmu pynroi ïa ki jingtei kiba kynthup ïa ka jingbei tyngka kaba haduh T.20,000 klur, da kaba pynleit jingmut bha ban pynbha ïa ki surok bah jong ka jylla, ki surok bah jong ki distrik (MDR) bad ka jingpynïasoh hapdeng ki jaka treikam jong ki distrik bad ki taluk.
Haba ai jingtip sha ki nongthoh khubor hadien ba la wai ka jingïalang jong ka kynhun Myntri, u Myntri ka RDPR u Eshwar B Khandre u la ong ba ka sorkar ka la shim ïa ki katto katne ki rai kiba thmu ban pynkhlaiñ ïa ki jingtei, ban pynbha ïa ka jingpynïasoh bad ban pynsted ïa ka roi ka par ha baroh kawei ka Karnataka.
“Ka jinglong jingman ha ka liang ka pisa tyngka bad ka ïoh ka kot jong ka jylla ka long kaba khlaiñ bha, ha kaba ki jinglum khajna, kynthup ïa ka GST bad kiwei kiwei ki jingïohnong, ki pynbiang ïa ki jingkhmih lynti ha kylleng ki tnad, kaba ailad ïa ka sorkar ban pyndep ïa ki jingkular jong ka,” u la pynshisha.
“Ka kynhun Myntri ka la ai jingmynjur na ka bynta ka prokram pynroi surok kaba heh kaba kynthup haduh 20,000 klur tyngka. Ka jingthmu jong ngi ka long ban pynbha ïa ka jingpynïasoh surok ha kylleng ka jylla, khamtam hapdeng ki distrik bad ki jaka sah jong ki taluk, bad ban pynkhlaiñ ïa ka network surok kaba la don lypa,” ong u Khandre.
Hapoh ka Phase V, Stage II jong ka State Highway Development Project yn pynbha ïa ki surok ba 1,897km.
Ka Kynhun Myntri ka la mynjur T.6,000 klur hapoh ka Appendix-E na ka bynta ki surok, ki jingkieng bad ki jingtei jingtei ha ki Assembly Constituency bapher bapher. La mang sa 3,000 klur tyngka na ka bynta ban pynroi shuh shuh ïa ki surok.
Kawei pat ka rai kaba kongsan ka long ka prokram thymmai kaba T.6,000 klur ban pynroi haduh 3,986km ki surok kiba pynïasoh ïa ki jaka sah jong ki distrik kawei bad kawei pat, ki jaka sah jong ki distrik bad ki jaka sah jong ki taluk, bad ki jaka sah jong ki taluk kawei bad kawei pat.
