Chennai, Naiwieng:
Katkum ka jinglum jingkheiñ, la ong ba ki la don kumba 50,000 tylli ki syiar kiba la ïap, ha Tamil Nadu, ha kaba kiba bun ki nongri syiar ki la shah ktah jur khamtam ha kane ka por ba dei ka aïom lehkmen Diwali.
Ha kaba ïadei bad kane ka jingjia, uwei u nongri jingri, ba la tip kyrteng kum u Mohan, uba na Cuddalore distrik, u la pynpaw ïa ki jingeh ba u la ïakynduh na kane ka jingjia. Katkum ka jingïathuh jong u, u la ong ba u la duh ïa kumba 7,000 tylli ki syiar ha ka taïew ba la lah, da kaba peit ïa ka jingbei tyngka bad ka jingim jong u ba ka nang hiar dor katba ka jingpang bym lah ban ithuh ka nang pur lyngba ki jaka ri syiar ha ka distrik.
U Mohan u dei napdeng ki katto katne ngut ki nongri syiar kiba la ngat ha ka jingeh kaba la ïathuh ba la duh haduh 50,000 tylli ki syiar ha kylleng ki shnong ha Cuddalore ha kine ki hynriew sngi ba la dep. Kane ka jingjia ka la pynmih ïa ka jingtieng, ha kaba ka jingpynïakhlad ïa ki syiar bad ka jingtep ïa ki syiar kiba la ïap ka dang ïaid shakhmat. Ki nongrep ki peit bniah ïa ka jingduhnong kaba khraw ha ka liang ka ïoh ka kot, ha kaba ka jingeh ka la jia tang ha shwa ka aïom Diwali kaba heh bha, ha kaba ki khmih lynti ba ka kam kan kiew.
Na ka bynta u Mohan, ka jingkit kaba khia ha ka liang ka pisa tyngka ka nang kiew man ka sngi. Kawei ka khun syiar ka shongdor kumba T.47-48, katba ka pla jingbam syiar kaba 50 kg ka shongdor hapdeng T.2,500 haduh T.2,600. Tang ka bai bording ka poi haduh 10 hajar haduh 20 hajar tyngka.
“Ngim lah ban leh ei ei shuh. Ngim lah ban im na kane. Ngi shu shong hangne khlem jingïarap, hadien ba ngi la bei tyngka T.40 haduh T.50 lak. Ha ka jingïalang, ngi la duh 40,000 haduh 50,000 tylli ki syiar,” u ong, haba kdew ïa ka jingduhnong ha kylleng ki jaka ri sim ba shah ktah.
Ki nongri jingri ki batai ïa ka rukom kaba pynkulmar jingmut ha ki jingïap. Ki ong ba ïa ki syiar la lap ba ki kjat jong ki ki la pynjrong shadien bad ki thapniang jong ki ki la piar. Da kaba ym pat tip ïa ka daw jong ka jingpang, ka la nang kiew ka jingsngewkhia halor ka jinglah ban don shuh shuh ki syiar kiba ïap bad ka jingktah ïa ki stock jong ki kiba dang sah.
Hynrei ki bor synshar distrik ki kheiñ ba ka jingdon jong ki syiar kiba la ïap ka long haduh 26,000 tylli, kaba duna bha ban ïa ki sim kiba la ïap haduh 50,000 tylli kiba la ïathuh da ki nongrep. Uwei u heh jong ka bor synshar distrik u la ong ha ka lad phah khubor. “Ka kaiphod na kaba leh test nyngkong eh jong ka laboratory ka la weng noh ïa ka jingpang khlam jong ki syiar, hynrei ïa ka daw jong ka jingpur jong kane ka jingpang ym pat lah ban tip.”
Mynta ka sorkar Tamil Nadu ka la phah shuh shuh ïa ki nongmuna sha kawei ka Laboratory ha Bhopal ban test shuh shuh. Ki nongrep ki dang ap ïa ka jingmih, da kaba kyrmen ba kin pynshisha ïa ka daw bad ïarap ban wad ïa ki lad ki lynti ban teh lakam ïa ka jingpur ne ka jingsaphriang jong ka jingpang.
U Mohan u ong ba ka jingkyrpad bunsien sha ki heh sorkar bad ki doktor mrad kam shym la wanrah jingpynjem kloi ïa ki.
“Ngi dang ïaleh mynta. Ngim pat lap ïa ki lad ki lynti. Haba ngi ïakren bad ki heh sorkar bad ki doktor, ki ong ïa ngi ba ngim dei ban leit shano shano ruh bad ba ka kaiphod test kan sa mih shen,” u la ong.
Da ka jingwan jong ka aïom Diwali, ki nongri syiar ki tieng ba ka jingbteng jong ka jingpang kan lah ban pynduh jait shuh shuh ïa ki jingri jong ki bad iehnoh ïa ki ban ïaleh ban khie im biang na ka jingduhnong. Na ka bynta u Mohan bad kiwei pat kiba kum ma u, ka jingsngewkhia kaba mardor ka long kumno ban pynneh pynsah ïa ki jaka ri jingri bad ki rukom im jong ki.
