Abu Dhabi, Naiwieng:
La ong ba ki nongleit iakren iasuk na Ukraine, Russia bad United Staes, ki la ioh ban iakynduh lang hapoh ka nongbah Abu Dhabi ha ka Sngi Ba-ar ban pynkut noh ïa ka thma ba shyrkhei bad kaba la neh slem bha hapdeng kitei ki arliang mamla (ka Russia & ka Ukraine) bad kaba long ruh ka thma kaba la neh slem bha hadien jong ka Thma Bah ba Ar ha ki por mynshwa.
Katkum ka jingai dak jong u President ka United States- u Donald Trump, la iathuh ba ka Europe ka dang ïa pynbeit bad ka Russia halor ki kam ïada ri ba iadei bad ka tnat ‘European Security’ bad ba kan phah ruh ïa ki nongmihkhmat sha Abu Dhabi ban iadon bynta lang ha katei ka jingiakren hapdeng ka Russia bad Ukraine, ka ban lam khmat da ka United States ha katei ka sngi.
Namar la ong ba u Trump u la pyrshang katba lah ban pynkut noh ïa ka thma hapdeng ka Russia bad ka Ukraine naduh ba u la wanphai biang sha ka bor synshar, hynrei ki jingïakren ba mynshwa kim shym la pynmih kano kano ka jingjop bad katei ka jingïaid lynti ka la kylla long sharud namar ka thma jong ka US bad ka Israel pyrshah ïa ka Iran.
Ka Europe bad ka Ukraine ki sheptieng ba ka America kan pynbor ïa ka jingïateh kular halor ka Kyiv ka ban long kum ka jingaiti lut, ha kaba u Trump un paw ba un phai khmat sha ka Moscow mynta u snem.
Ka jinghiar thma jong ka Moscow ïa ka Ukraine, ka la pyniap da ki spah hajar ngut, ka la pynkynriah ïa ki lak ngut bad ka la neh haduh 56 bnai, ha kaba ka Kremlin, kam pyni dak eiei ban kynran dien.
