Shillong, Naiwieng 15
U Symbud Myntri Rangbah ka Jylla bad State President ka NPP, Bah Prestone Tynsong u la ong ba ka Sorkar Jylla ka la kyntu ïa ka Joint Parliamentary Committee (JPC) ban khmih bniah bad pynkylla ïa ki kyndon ba kyrpang jong ka ‘FCRA Amendments’ (ba la tyrwa) ki ban ktah beit-beit ïa ki kynhun Khristan bad ki ‘riewngeit Khristan kumjuh.
“Ngi la buh ïa ki jingai jingmut jong ngi hakhmat ka komiti bad ngi la pynsngew ïa ka jingbatai sha ka JPC, da kaba kyrpad ïa ka ban khmih bniah ïa kito ki kyndon,” la ong u Bah Tynsong.
“Ka nongrim jong ka Sorkar Jylla ka long ban pynkylla katto-katne ki laiñ jong ki jingpynkylla ba la tyrwa. Kim dei ban long than kiba pyrkhing haduh katta-katta,” u la bynrap.
U Bah Tynsong u la pynshai ba ka Jylla kam pyrshah ban pynkylla ïa katei ka aiñ.
“Kane ka aiñ ka dei kaba la don la slem bah. La wanrah ruh ïa ki jingpynkylla wat ha ka por ba synshar ka Sorkar Congress ha u snem 2010 bad 2012,” u la ong.
“Ka jingpynkylla, namarkata, ka paw ha nga ba ka long kaba kongsan bad kaba donkam,” u la bynrap.
Hynrei u la ong ba ki don katto-katne ki kyndon kiba la wanrah ïa ka jingsngewkhia.
“Katto-katne tylli ki laiñ ha ki jingpynkylla ba la tyrwa, ngi sngew shimet, kin ktah beit-beit ïa ki kynhun Khristan bad ki ‘riewngeit Khristan,” u la ong.
Haba jubab ïa ka jingkyrpad jong u MP barim ka Rajya Sabha bad State-President barim ka NPP, u Dr. W.R. Kharlukhi dang shen ïa ka BJP bad ka NPP ban ‘vote’ pyrshah ïa ka ‘FCRA Bill’ ynda la wanrah ha Parliament, u Bah Tynsong um shym la kwah ban kren eiei tad haduh ba ka JPC ka pyndep ïa ka kam jong ka.
“Ïa mynta, ngam don eiei ban ong, namarba ka Joint Parliamentary Committee ka dang khmih bniah ïa kane ka kam,” u la ong.
“Ka JPC dang shen ka la wan sha Shillong bad ïakynduh ïa baroh ki nongïashim bynta halor kane ka mat. Ngan ym kren eiei tad haduh ban da aiti ïa ka jingpynkylla ne ka jingai jingmut jong ka JPC sha ka Sorkar India,” u la bynrap.


