Kumba 32 snem shah ïeh beiñ ka surok jong ki 5 tylli ki shnong

Mawkyrwat, Naiwieng 15 Ka Khasi Student Union (KSU) South West Khasi Hills District ryngkat ka KSU Ranikor Circle hapoh ka jingïalam u samla Forwardman Nongrem, President KSU South West Khasi Hills District bad u samla...

Mawkyrwat, Naiwieng 15

Ka Khasi Student Union (KSU) South West Khasi Hills District ryngkat ka KSU Ranikor Circle hapoh ka jingïalam u samla Forwardman Nongrem, President KSU South West Khasi Hills District bad u samla Marconi Thongni, President KSU Ranikor Circle hadien ka jingud jingnam ki paidbah ha ka 14 tarik u Naiwieng 2026 ki la hiar jurip sha ki san tylli ki shnong ban ïakynduh ïa ki nongïalam shnong jong ka shnong Myriaw, Ditumtum, Pyndenlaru, Kolongboit bad ka Photeitsim halor ka jingsniew palat ka surok naduh lad Photmula shaduh Ditumtum kaba jngai kumba 9 km eiei.

Kine ki shnong lada kheiñ lang ki la don kumba 200 tylli ki longïing bad kumba 1000 tam ki nongshong shnong hynrei kaba sngewsih ka long ba kine ki shnong mynta la kumba 32 tylli ki snem kim pat biang ïa ka surok naduh ba la sdang ban shna ïa ka ha u snem 1994/96.

Ha kane ka sngi ki nongshong shnong ki la pynpaw ïa ki jingeh jong ki ha ki nongïalam ka KSU ha kaba ïadei bad kane ka surok kaba la buh jingeh ïa ki nongshong shnong ha ka leit ka wan ban kit ïa ki mar-rep mar-riang bad khamtam eh ha ka pang ka shitom.

Ha kane ka sngi na ka liang ka KSU lem ki paidbah nongshong shnong jong ki 5 tylli ki la shim ïa ka rai ba shen kin sa leit ban ïakynduh ïa u MLA/MDC ka Ranikor Konstitwensi u Bah Pius Marwein lem ïa u Myntri ka tnad PWD ban dawa ba ki dei ban maramot bad pynbha mardor ïa kane ka surok kaba la jot rathai kaba jngai tang 9 km hynrei kaba shimpor pat da ki kynta ban leit ban wan bad kaba la buh jingeh haduh katta katta ïa ki nongshong shnong.