Shillong Naiwieng 15
Ki nongot doh Masi hapoh ka shatri ka Butcher Association of Meghalaya ki pynpaw ïa ka jingsngewsih haba ïadei ka jingshah bat ki kali ki jongki ha ka 12 tarik Naiwieng ha 20mer Ri-Bhoi District.
Haba ïakren sha ki nongthoh khubor u Bah Esron Marweiñ President ka Butcher Association of Meghalaya u la ïathuh ba ki don ki kynhun
sengbhalang kiba bat ïa ki kali, watla ki trai nongot doh ki la pynshai ba kine ki masi ba ki kit ki dei na ka bynta ban pynbiang doh ha ka Jylla, kaba la pynlongia u ban leit hiar shaduh katei ka jaka na ka abynta ban iakren ynbeit ïa kane kam.
Shuh-shuh u la ong ba ka por sha ka por u la ju kren pynshai lyngba ki lad pathai khubor halor ka jingeh kaba ki nongot doh masi ki mad, hynrei ymdon ba sngewthuh ïa kane ka jingeh kaba ki nongot doh ki mad, ki don beit kiba pyrshang ban thaw ki lad ki lynti ban ïoh daw bad kylli ïa kita ki kot ki sla, hynrei hadien ka jingïakren la ïapoi ha ka jingsngewthuh. Namar ka seng ka ju wat ïa ki lad ki lynti ban khanglad ïa ka jingkhaïi tuh ïa ki Masi sha Bangladesh.
Shuh-shuh u la pyntip ba ha katei ka sngi ki la ïa shong pyrkhat haba ia dei kane ka jingeh ha kaba ki la shim ruh ka rai ba kaba BAM ha kane ka taïew kan sa mih sha khmat ban bat ïa ki kali ba kit masi ki ba khaïi sha Bangladesh khnang ba ki nongot doh kin kham suk kham saiñ bad ïoh ïa ka mar ka mata kaba kham biang bad ban lah ban pynbiang ïa ka doh Masi ha ka Jylla.
U Bah Marweiñ u la ong ba mynta ki nongot doh ki mad shibun ki jingeh ban ïoh mar, ka dor ka la rem palat ban thied, da kaba kynnoh ba bun kiba khaïi sha Bangladesh, kumta ka BAM ka kren shai ba kan sdang ïa kane ka kam ban bat kali bad ban aiti ïa ki briew kiba leh ïa kane ka kam sha ki bor ka aiñ.
Shuh-shuh u la ong ba na ka por sha ka por ka BAM ka ju ai jingthoh sha ki bor pulit ban ïarap ban bat ïa ki kali kiba kit mar ban khaïi sha Bangladesh, hynrei kim ïohi ba kane kan long kaba seisoh. “Ngim tip na kaei ka daw ïoh dei ba ki bunkam ba kin hap ban pyndep ïa kaba ki la bynshet ha ki, na kata ka daw ka seng ka rai ban mih sha khmat ban bat ïa kali kit mar kiba khaïi sha Bangladeh” u la ong.
U Bah Marweiñ u la kren shai ba ha kane ka sienjam ba ka BAM ka shim ban bat ïa ki kali kan ym treh ban ïatreilang bad kino-kino ki seng, kan leh beit marwei bad kan aiti ïa ki kali sha ki bor jong ka aiñ bad ba ka aiñ kan leh ïa kaba donkam.


