Shillong, Naiwieng 16
Ka tamasa Cherry Blossom kan nym sangeh satia da kino-kino ki jingïakhih, bad ruh ki jingïakhih kin nym shah pynsangeh da ki tamasa.
Kane ka dei ka khubor kaba la ai da u Myntri ka tnad ki Kam Jngohkai ka Jylla u Bah Paul Lyngdoh ha ka sngi Nyngkong, ha kaba u la kyntait ïa ka jingtieng ba ka jingïakhih pyrshah ïa ka ropeway project ka lah ban ktah ïa kane ka tamasa kaba long kawei na ki prokram jong ka Sorkar.
U Bah Paul u la ong ba ka Sorkar kam kheiñ ïa ka jinglong jingman kum kaba thymmai ne kaba ym lah ban pynbeit ne pynïaid. Man la u snem, u la ong, ka la hikai ïa kaei-kaei.
“Ngi la pynïaid ïa kiei-kiei ha kata ka rukom ba, kumba nga la ïasam bad phi, kawei pa kawei ka snem jong ka tamasa Cherry Blossom ka la long ka jinghikai na ka bynta jong ngi, bad ngi la pynkiew ïa ki jingpynbeit ïa ka jingpahara,” u la ong.
U la buh ïa ka jingïalong ryngkat jong ka jingrakhe bad ka jingpyrshah kum kaba jai jai, ym kum ka jingbym lah jong ka jinglong jingman ka suk ka saiñ.
“Phi leit sha kano-kano ka nongbah ha ka pyrthei, phin don beit kawei ka liang ha kaba phi don ka Jantar Mantar bad ki jingpyrshah, kawei pat ka liang, phin don ki tamasa bad ki jinglehkmen,” u la ong. “Kumta ka jingim ka long, bad ym don satia kano kano ka jingartatien ba kiei-kiei kin ïaid beit ïaid ryntih.”
Haba kylli hato dang lah ne em ban ïakren bad ka Joint Action Committee kaba lam khmat ïa ka jingïakhih pyrshah ropeway, u Bah Paul u la pynphai pat ïa kane ka jingkylli sha ki nongïakhih.
U la ong ba u la buh ïa ka jingkhot kaba plie haduh ar snem shiteng. Ym don mano-mano na ka JAC kiba la shim ïa kane, u la ong.
“Nga la ai jingkhot ïa kano-kano ka kynhun ban wan, kim shym la wan la ïaid haduh ar snem shiteng,” u la ong. “Nga la don ha ka kamra ha Secretariat, nga ïohi ïa phi man ka sngi, hynrei ngam ju ïohi ïa ka JAC la ar snem shiteng.”

