Ngi tip kum ki nonghikai ym kum ki kruiñ, pynpaw jingbitar ki nonghikai KJDSTA

Shillong, Naiwieng 16 Ka jingkren jong u Bah Prestone Tynsong, Symbud Myntri Rangbah ka Jylla ha kawei na ki jingïalang kaba u la ong ba ki nonghikai ki dei kiba pynbam kruiñ ïa ka Jylla,...

Shillong, Naiwieng 16

Ka jingkren jong u Bah Prestone Tynsong, Symbud Myntri Rangbah ka Jylla ha kawei na ki jingïalang kaba u la ong ba ki nonghikai ki dei kiba pynbam kruiñ ïa ka Jylla, na ka liang ki nonghikai kiba don ha ka shatri ka Khasi Jaiñtia Deficit School Teachers Association (KJDSTA) ki la pynpaw ka jingbitar halor kane ka jingkren jong u.

Haba kren sha ki lad pathai khubor ha ka 16 tarik Naiwieng, 2026, ka Kong Barbara Lamin, General Secretary ka la ong ba 25 snem ka la don ha kane ka kam bad kane ka dei ka sien kaba nyngkong ba kum ka nonghikai ka shah khot kruiñ.

“Lada ka long kumta hap ban pynkylla noh ïa ka sngi burom ki nonghikai sha ka ‘sngi burom kruiñ’ bad ban bynrap ba ka jingkren u Symbud Myntri Rangbah ka Jylla ka long kumba u pynïahap ïa ki bad ki mrad.

“Ko Sorkar phi hap ban pyrkhat halor kane ka jingïakren. Ka Sorkar ka dei ban pynmab hakhmat ka imlang ka sahlang, namar ba kum ki nonghikai ngi tip halade kum ki nonghikai, ym ki kruiñ. Kane ka dei ka sien kaba nyngkong ban ïohsngew ba shah khot kruiñ ïa ki nonghikai,” la ong ka Kong Barbara.

Ka la ong ruh ba ka kam nonghikai ka dei ka kam kaba kordor tam hynrei hakhmat ka Sorkar ka dei ka kam kaba poh tam.

Na ka liang u Bah Boswell Pala, President, u la ong ba dei ka Sorkar kaba bam ïa ka hok jong ki naduh ka DA ka CPF.

U la ong ba kumno kin ai ïa ka hok jong ki kaba ki la kamai shitom sha ka Sorkar, watla kadei tang 1 tyngka ruh, khlem da don kano-kano ka jingïapynbeit.

Nalor kata, u la ong ruh ba yn ong shuh kumno da kaba kdew ba u briew uba kren ïa kine ki kyntien, u dei uba la pynpaw shai ba u kloi ban ïatreilang ruh bad ki ksuid.

“Ka jingkhot kruiñ ïa ki nonghikai ka paw shai ba ka Sorkar ka kheiñ poh ïa ka pule puthi hapoh ka Jylla,” la bynrap u Bah Boswell.