Bat ki shipai BGB ïa u shipai BSF, kynnoh ba rung bakla sha u pud Bangladesh

Shillong, Naiwieng 17 Ki shipai khappud ka Ri Bangladesh, ka Border Guard Bangladesh (BGB) ha ka 17 tarik u Naiwieng 2026, ki la bat ïa u shipai pahara khappud ka Ri India, ka Border Security...

Shillong, Naiwieng 17

Ki shipai khappud ka Ri Bangladesh, ka Border Guard Bangladesh (BGB) ha ka 17 tarik u Naiwieng 2026, ki la bat ïa u shipai pahara khappud ka Ri India, ka Border Security Force (BSF), da kaba kynnoh ba u la jam sha u pud ka Ri Bangladesh ha Gowaighat ka thaiñ Sylhet.

Katkum ki ophisar ka BGB, katei ka jingjia ka la jia ha ka por 12 baje shiteng sngi ha Bichanakandi Border Outpost ha kaba la ong ba u shipai BSF, u la jam palat haduh 200 jam sha Bangladesh ryngkat ka tiar siat.

Ka kynhun pahara na Bichanakandi Border Outpost (BOP) hapoh ka Sylhet Battalion (48 BGB), ka la ïoh ïa u tei u shipai bad leit bat ïa u.

U Lieutenant Colonel Nur Uddin Ahmad, Comman-ding Officer ka Sylhet Battalion (48 BGB), u la ong ba ïa u shipai BSF bad ka tiar siat jong u, la bat ha Camp ka Bichanakandi BOP.

Kham hadien la ong pat ba u shipai BSF u la shu poi bakla sha ka jaka ka Ri Bangladesh.

Shuh-shuh la ong ruh ba ki durkhih kiba saphriang ki pyni ba u shipai BSF u kren lyngba ka walkie-talkie jong u bad kyrpad ïa ka Unit jong u ban wan ïarap. La ong ba u shipai BGB u la knieh ïa ka walkie-talkie bad ïaleh ban kurup ïa ka INSAS Rifle jong u.

Ka BGB ka la tyrwa ïa ka Flag Meeting bad ka BSF ban ïakren halor kane bad ki ophisar ki la ong ban aiti ïa u tei u shipai lyngba katei ka Flag Meeting ha ka jingdon lang ki heh shipai na baroh ar tylli ki Ri.