Leit wah ‘banner’ ka HYC hakhmat Secretariat ban pynrem ïa u Bah Prestone

Shillong, Naiwieng 17 Ka Hynñiewtrep Youths’ Council (HYC) mynta ka sngi Ba-ar ka la wah da ki jingthoh (banner) ha ki kynroh bad ki khyrdop jong ka Secretariat kum shi bynta ban pynrem ïa ka...

Shillong, Naiwieng 17

Ka Hynñiewtrep Youths’ Council (HYC) mynta ka sngi Ba-ar ka la wah da ki jingthoh (banner) ha ki kynroh bad ki khyrdop jong ka Secretariat kum shi bynta ban pynrem ïa ka jingkren u Symbud Myntri Rangbah ka Jylla u Bah Prestone Tynsong halor ka jingkynnoh ba u khot ïa ki nonghikai kum ki ‘kruiñ’ bad ‘sohpyut’.

Haba kren sha ki lad pathai khubor, u Secre-tary ka Education HYC u samla Enlang Sawian u la ong ba katei ka jingkren ka pynjah burom ym tang ïa ki nonghikai, hynrei ïa ka imlang sahlang hi baroh kawei.

“Mynta ka sngi, ngi la wan ban wah ïa kitei ki banner ban pynrem ïa ka jingkren jong u Bah Prestone Tynsong pyrshah ïa ki nonghikai, ha kaba u la kynthoh ba ki dei ki ‘kruiñ’. U la kren ïa kane ka jingkynthoh pyrshah ïa ki nonghikai kiba la pynlong ïa ki kumba ki long mynta,” la ong u samla Enlang.

“Ki nonghikai kim shakri tang ïa ki khynnah skul, hynrei ki ïarap ruh ban pynwan dur ïa ka Jylla baroh kawei. Kane ka jingkren pyrshah ïa ki nonghikai da u Bah Prestone ka pyni ba kane ka Sorkar MDA, hapoh ka jingïalam jong ka NPP, kam don satia ka jingburom ïa ki nonghikai,” u la bynrap.

U la ong ba ki ‘kruiñ’ bad ‘sohpyut’ kim dei ki nonghikai, hynrei ki dei ki briew kiba shong ha Secretariat kiba pynlong pyut ïa ka Jylla baroh kawei,” u la ong.

U samla Enlang u la ong ba ka HYC Education Cell ka la ïeng ryngkat bad ki nonghikai Deficit naduh kaba sdang namar ki jingdawa jong ki, ki long kiba shisha.

“Ki nonghikai Deficit ki dawa ban pyntreikam ïa ka CPF Scheme 2023, hynrei ka Sorkar ka la jied ban ïaid lait ïa kata da kaba pyrshang ban pyntreikam ïa ka CPF Scheme 2026, kaba long pyrshah ïa ka jingmyntoi jong ki nonghikai Deficit,” u la bynrap.

U la buh jingkylli ruh ïa ka jingong jong ka Sorkar ba ki jingkhang jong ka ki plie na ka bynta ka jingïakren, hynrei kam don jingmut lada ka miej kaba ka tyrwa ka pyni ba phim burom ïa ka miej, bad phi kren beiñ ïa ka imlang sahlang jong ki nonghikai,” la ong u samla Enlang.

“Ka long kumba ka Sorkar ka kyrshan tang ïa ki kynhun kiba bud ïa ka laiñ jong ka, hynrei haba ïadei bad kito kiba pyrshah ïa ka Sorkar, ka paw ba ka lah ruh ban pyndonkam bakla ïa ka bor jong ka,” u la ong.

“Dang shen, ka la don ka jingïalang jong ka JAC pyrshah ïa ka projek ropeway, bad ngi la ïohi ba ki bor Sorkar ki pyrshang ban pynsngap jar ïa ka sur jong ki,” u la bynrap.

U la maham ba ka HYC kan ïeng bad ki nongïakhih lada ka Sorkar ka dang pyndonkam bakla ïa ka bor.

“Ngin nym ailad ïa kum kine ki briew ba kin ïai bteng ban pyndonkam bakla ïa ka bor jong ki, bad lada ki ïai bteng ban pyndonkam bakla ïa ka bor jong ki ne pyrshang ban pynsngap jar ïa ki sur, ka HYC kan don beit ha lyndet jong kine ki nongïakhih,” u la ong.

Katto katne na ki ‘banner’ ba la pyndait da ki nongïakhih ka HYC ki thoh: “Ki nonghikai kim dei ki sohpyut. Ki dei ki tynrai kiba pynheh pynsan ïa ka lawei jong ka Meghalaya”, “Sangeh noh ban pynjah burom ïa ki nonghikai! Sdang ban ai jingkheiñ ïa ki jingbymlah jong phi! Wat kynnoh ïa ki nonghikai! Pynbeit ïa ka rukom pule puthi! Burom ïa ka lawei jong ka Meghalaya.

Hadien katto katne kynta ki pulit ki la weng noh ïa ki ‘banner’ kiba la wah hakhmat Secretariat.