Shillong, Naiwieng 17
Ki nongshong die dukan ja ha jaka ïeng bos ha Ïew Mawlong ki la ai jingkyrshan ïa ka jingïakhih ki nongñiah bos kiba la sangeh ban kamai da kaba ïeng ha katei ka jaka kum ka jingpyrshah ïa ka jingbthah ka Sorkar ban kynriah noh khnang ban pynrung da ki nongdie madan.
Ki la pynpaw ba ha kine ki shi taïew ba la sangeh kamai ki bos ka la ktah shisha ïa ka kamai jong ki namar ka du\kan jong ki kam ïaid shuh hynrei lada kim lah die ruh kin shong beit ban die.
Kawei ka longkmie kaba shong die dukan die ja ha jaka ïeng Bos ha Ïew Mawlong ka la ïathuh ba ka la shong die mynta palat saw phew snem naduh ka por ba ka dang samla hynrei kam sngewïahap ba ka Sorkar kan phah mih noh ïa ki bos nangne na jaka.
Kine kiba shong die dukan ja ki don palat 10 tylli ki la pynpaw ka jingbym sngewïahap ïa ka jingleh ka Sorkar ban phah mih ïa ki bos namar ki nongshong dukan die ja ki im na kiba ñiah bos haba ki wan pynhiar ïa kiba shong kali bad ki nongñiah bos ruh ki bam ja na dukan jong ki.
Ka la pynpaw ba kan shong beit hangne ha jaka ïeng bos lada ka Sorkar ka la phah mih ïa ki bos bad pynrung bujli da ki nongdie madan.
Katba ki daju kiba dei ki nongkit ïa ki mar ki mata ki la pynpaw ka jingsngewsih naduh ba sangeh kamai ki bos namar ki ruh kim ïoh shuh ban bylla ban pyndap ïa ka ïing ka sem namar bym don shuh ba wan pynhiar mar bad ym don shuh ba thep mar.
Ki la pynpaw ba lada la ïeng ki bos ha jaka ïeng kali ha Anjalee ki hap shim bai kit arshah namar ka la kham jngai sha Ïewduh.
Kumban shu pynkynmaw kane ka jingïakhih ki nongñiah bos da kaba ïeng beit ha jaka ïeng kali ha Ïew Mawlong ka la sdang naduh mynshem taïew ban pynpaw jingpyrshah haba ka Sorkar kan phah mih noh ban leit ïeng sha Anjalee.
Ka jingphah mih ka Sorkar ïa ki bos namar kan pynrung bujli da ki nongdie madan.
